Böyük Britaniya Sudana sanksiyalar hazırlayır

Böyük Britaniya hökuməti Sudanda hərbi əməliyyatlar fonunda vəziyyətin gərginləşməsi səbəbindən bu ölkəyə qarşı yeni sanksiyalar hazırlamağa başlayıb. Xarici İşlər Nazirliyi məsələ ilə bağlı işlərə start verib. Xarici işlər naziri İvett Kuper bu barədə Britaniya parlamentinin aşağı palatası olan İcmalar Palatasında çıxışı zamanı məlumat verib.

Nazir Kuper bildirib ki, o, əməkdaşlarına Sudanda insan haqlarının pozulması və hakimiyyətdən sui-istifadə ilə bağlı mümkün sanksiyaların hazırlanması üçün göstəriş verib. Bu cəza tədbirləri hazırlanarkən, London həm də diplomatik yolla təzyiq göstərir. Britaniya Sudandakı döyüşən tərəfləri dərhal atəşkəs elan etməyə çağırıb.

Bu çağırış üç aylıq müddəti əhatə edir və əsas məqsəd ölkəyə təxirəsalınmaz humanitar yardımın çatdırılmasını təmin etməkdir. İvett Kuper qeyd edib ki, bu atəşkəs təcili tələb olunur. Üç aylıq humanitar atəşkəs zəruri malların əhaliyə çatdırılmasına zəmanət verəcək, deyə o əlavə edib.