Bu marşrutun hərəkət sxemi dəyişdirilir

Əvvəllər Sumqayıt şəhəri və Saray qəsəbəsini Bakı Beynəlxalq Avtovağzal Kompleksi ilə əlaqələndirən 503 nömrəli müntəzəm marşrutun hərəkət sxemi dəyişdirilir. Azərbaycan Yerüstü Nəqliyyat Agentliyindən verilən məlumata görə, bu dəyişiklik sərnişin axını nəzərə alınaraq edilir.

Noyabrın 1-dən etibarən 503 nömrəli marşrut avtobusları Sumqayıt şəhərini birbaşa “20 Yanvar” metrostansiyası ilə əlaqələndirəcək. Bu yeni sxem sərnişinlərin şəhərlərarası gediş-gəlişini xeyli sadələşdirəcək. Marşrut Sumqayıt şəhərinin Zülfü Hacıyev küçəsindən başlayacaq. Onun paytaxtdakı son dayanacaq məntəqəsi isə Seyid Cəfər Pişəvari küçəsidir.

Marşrut üzrə istifadə edilən müasir və ekoloji təmiz avtobusların sayı sərnişin tələbatına uyğun olaraq artırılır. Beləliklə, marşrut xəttində cəmi 21 avtobus xidmət göstərəcək. Bu nəqliyyat vasitələri 8-9 dəqiqə intervalla hərəkət edəcək, beləliklə, xidmətin etibarlılığı və tezliyi təmin olunur. Qeyd edək ki, marşrut üzrə sərnişindaşıma nağdsız ödəniş əsasında həyata keçirilir. Gedişhaqqı 0.80 AZN təşkil edir.