Cəbrayılın Horovlu kəndinə növbəti köç olub, açarlar təqdim olunub - FOTO - YENİLƏNİB

Cəbrayıl rayonunun Horovlu kəndinə növbəti köç prosesi uğurla həyata keçirilib. Ümumilikdə 18 ailə, yəni 66 nəfər, uzun illərdən sonra öz doğma yurdlarına geri dönüb. Yeni sakinlərə bərpa edilmiş evlərin açarları təqdim edilib.

Bu köç Horovlu kəndinin tam bərpası və həyatın canlanması istiqamətində atılmış vacib addımdır. Qayıdan ailələr respublikanın fərqli bölgələrində, xüsusən yataqxana, sanatoriya və inzibati binalarda müvəqqəti məskunlaşmışdılar. Onların doğma ocaqlarına qayıtması böyük sevinclə qarşılanıb. Köç prosesi Azərbaycan Respublikası Prezidentinin Cəbrayıl, Qubadlı və Zəngilan rayonları üzrə xüsusi nümayəndəliyinin, Qaçqınların və Məcburi Köçkünlərin İşləri üzrə Dövlət Komitəsinin, həmçinin ANAMA-nın mütəxəssislərinin iştirakı ilə baş tutub.

Doğma yurda qayıdan sakinlər onlara göstərilən hərtərəfli dövlət qayğısına görə minnətdarlıqlarını ifadə ediblər. Onlar Prezident İlham Əliyevə və Birinci vitse-prezident Mehriban Əliyevaya təşəkkürlərini çatdırıblar. Sakinlər Azərbaycan Ordusunun qəhrəmanlığı sayəsində bu gün öz kəndlərinə qayıda bildiklərini deyiblər. Bu səbəbdən qəhrəman əsgər və zabitlərə minnətdar olduqlarını bildiriblər. Sakinlər şəhidlərə rəhmət diləyib, onların ailələrinə də səbir arzulayıblar. Horovlu kəndi sakinlərin qayıdışı ilə yenidən həyata qayıdır.