Cənubi Qafqazda yeni reallıqlar və status-kvo qururuq - Hikmət Hacıyev

Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Qətərdə keçirilən “Doha Forumu”nda çıxış edib. O, “Ermənistan-Azərbaycan Davamlı Sülh: Vaşinqton Sazişi və Paylaşılan Gələcək” mövzusunda panel müzakirəsində iştirak edib. Hacıyev bildirdi ki, ölkə ədalətli sülh əsasında Cənubi Qafqaz regionunda yeni reallıqlar və yeni status-kvo qurur.

Diplomat regionda beynəlxalq hüququn legitimliyini, qanuniliyini və əsas prinsiplərini təmin edəcək ABŞ-nin vasitəçiliyi ilə Ermənistanla əldə olunan razılaşmanı alqışlayır. Hacıyev sülh təşəbbüslərinin uğursuzluq səbəblərinə də diqqət çəkib. O qeyd etdi ki, son zamanlar bir çox sülh təşəbbüsləri nəticəsiz qalıb. Bu, adətən, razılaşma imzalandıqdan sonra tərəflərin “komfort zona”sına düşməsi ilə bağlı olur.

Hikmət Hacıyev vurğuladı ki, Ermənistan və Azərbaycan rəsmiləri belə bir vəziyyətdən qaçmağa çalışır. Hər iki tərəf sülhün çətin bir mübarizə olduğunu dərk edir və məqsədə çatmaq üçün çox çalışmalıdır. Hacıyevin sözlərinə görə, iki paytaxtdakı rəsmilər müxtəlif kanallar vasitəsilə mütəmadi olaraq əlaqədədir. Onlar iki ölkə arasındakı razılaşmaların tam həyata keçirilməsi üçün ciddi şəkildə səy göstərirlər. Azərbaycan və Ermənistan regionda davamlı sülh qurmaq üçün işlərini davam etdirir.