Cinayətlə əldə edilən əmlakı leqallaşdırma ilə bağlı cərimələr sərtləşdirilir

Cinayət yolu ilə əldə edilmiş əmlakın leqallaşdırılması ilə bağlı sanksiyalar sərtləşdirilib. Bu mühüm məsələ Milli Məclisin plenar iclasında müzakirə olunan Cinayət Məcəlləsində dəyişiklik edilməsi haqqında qanun layihəsində öz əksini tapıb.

Bu dəyişikliklər qanunsuz yollarla əldə olunan əmlakın həqiqi xarakterinin, mənbəyinin, yerinin, sərəncam verilməsinin, habelə onun kimə məxsus olmasının ört-basdır edilməsi və ya gizlədilməsi kimi hərəkətlərə qarşı cəzaları yenidən müəyyən edir. Mövcud qanunvericiliyə əsasən, bu əməllər 4 min manatdan 8 min manatadək miqdarda cəriməyə səbəb olurdu. Cəriməyə əlavə olaraq, şəxs 3 ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilə bilərdi. Həmçinin, 2 ildən 5 ilədək müddətə azadlıqdan məhrum etmə cəzası tətbiq edilirdi.

Təklif edilən dəyişikliklərdən sonra cinayət predmetini leqallaşdıran şəxslərə tətbiq edilən cərimələr əmlakın dəyərinə əsaslanacaq. Bu cinayətə görə tətbiq ediləcək cərimə cinayətin predmetinin dəyərinin 50 faizindən 70 faizinədək miqdarında olacaq. Dəyişiklik həmçinin müəyyən vəzifə tutma və ya müəyyən fəaliyyətlə məşğul olma hüququndan məhrum edilmə müddətini 5 ilədək artırır. Azadlıqdan məhrum etmə müddəti 2 ildən 5 ilədək olaraq qalır. Qanun layihəsi səsverməyə qoyularaq üçüncü oxunuşda qəbul edilib.