Cüdo üzrə Azərbaycan çempionatında fərdi mübarizə başa çatıb

Cüdo üzrə Azərbaycan çempionatında fərdi mübarizə mərhələsi başa çatdı. Bakı İdman Sarayında keçirilən yarışın ikinci günündə 7 fərqli çəki dərəcəsində ümumilikdə 93 cüdoçu medal uğrunda mübarizə apardı. Bu gün tamamlanan qarşılaşmalar nəticəsində kişilər və qadınlar arasında fərdi yarışların qalibləri müəyyənləşdi. Çempionat sabah komanda yarışları ilə yekunlaşacaq.

Qadınlar arasında keçirilən yarışlarda üç çəki dərəcəsində mükafatçılar bəlli oldu. 48 kq çəki kateqoriyasında Könül Əliyeva ("Neftçi İK") birinci yeri tutdu, Şəfəq Həmidova ("Azəri-Cüdo İKİB") gümüş medal qazandı. Aişə Qurbanlı ("FHN İSK") və Diana Tçkayeva ("Azəri-Cüdo İKİB") üçüncü yerləri bölüşdülər. 52 kq-da "Neftçi İK"dan Aydan Vəliyeva qızıl, Leyla Əliyeva isə gümüş medal əldə etdi. Könül Eyvazlı və Gültac Məmmədəliyeva isə bürünc mükafatlara layiq görüldülər. 57 kq çəkidə isə Vüsalə Hacıyeva ("Neftçi İK") çempion oldu, Gülnarə Bayramova ("Neftçi İK") ikinci yeri, Ülviyyə Bayramova ("Şuşa UGİM") isə üçüncü yeri tutdu.

Kişilərin mübarizəsində dörd çəki dərəcəsində qaliblər elan edildi. 81 kq-da "Atilla İK" idmançısı Vüsal Qələndərzadə qızıl medala sahib çıxdı. Süleyman Şükürov ("Neftçi İK") ikinci oldu, Mehdi Abbasov və Cəsur İbadlı üçüncü yerləri qazandılar. 90 kq çəki dərəcəsində Məmmədrza Hacızadə ("Sərhədçi İM") zirvəyə yüksəldi, Aslan Kotsoyev ("Judo Club 2012") gümüş, Əli Qazıməmmədov və Xəyyam Əliyev bürünc medalları əldə etdilər. Ağır çəkilərdə, 100 kq-da Elmar Qasımov ("Atilla İK") çempion adını qazandı. Əjdər Bağırov ("DİN İC") gümüşlə kifayətləndi. Kənan Nəsibov ("Kanokan-TT İK") isə ən ağır, +100 kq çəki dərəcəsində birinci yerin sahibi oldu. Fərdi yarışların bitməsi ilə ölkə çempionatı sabah keçiriləcək komanda mübarizəsi ilə sona çatacaq.