D-8 dövlətlərinin Bakıda keçirilən Media Forumu qlobal informasiya təhlükəsizliyinə töhfədir - Cəlil Xəlilov

Bakıda 21 noyabr 2025-ci il tarixində “Dialoqun, əməkdaşlığın və regional həmrəyliyin təşviq edilməsi” mövzusunda keçirilən D-8 Media Forumu qlobal informasiya təhlükəsizliyinin təmini istiqamətində atılmış tarixi addımdır. Müharibə, Əmək və Silahlı Qüvvələr Veteranları Təşkilatının sədri polkovnik Cəlil Xəlilov bu fikri açıqlayıb. O bildirib ki, D-8 Forumu 2 milyarddan çox insanı əhatə edən dövlətləri birləşdirir, bu rəqəm tədbirin qlobal miqyasını göstərir.

Polkovnik qeyd edib ki, Prezident İlham Əliyevin forum iştirakçılarına ünvanladığı müraciət və müraciətdə yer alan çağırışlar tədbirin mühüm əhəmiyyətini göstərir. Azərbaycan Prezidentinin Administrasiyasının Xarici siyasət məsələləri şöbəsinin müdiri Hikmət Hacıyevin Forumda iştirakı da bunun bariz nümunəsidir. Forumda informasiya təhlükəsizliyi üçün təhdid yaradan hallar, eləcə də “media çirkliliyi”nin aradan qaldırılması yolları ətraflı müzakirə edilib. D-8 Media Forumu bir daha sübut etdi ki, Azərbaycan qlobal təhlükəsizliyin ayrılmaz hissəsi olan informasiya təhlükəsizliyinə böyük önəm verir, bu təhlükəsizliyin etibarlı şəkildə təmin edilməsini çox vacib sayır.

Cəlil Xəlilov Prezident İlham Əliyevin müraciətinin bir-birindən önəmli çağırışlarla zəngin olduğunu vurğulayıb. Prezident Aliyev qlobal informasiya təhlükəsizliyinin təmin edilməsi üçün atılması gərəkən addımlara diqqət çəkib. Bu addımlardan biri D-8 ölkələrinin media orqanları arasında əməkdaşlığın genişlənməsi oldu. Digər mühüm təklif isə ortaq media platformasının yaradılması idi.

Azərbaycan dövlət başçısının irəli sürdüyü bu çağırış dezinformasiya və saxta xəbərlərə qarşı mübarizə aparmaq baxımından həqiqətən də böyük əhəmiyyətə malikdir. Forum dövlətlərinin media qurumları arasında əməkdaşlığın dərinləşməsi dəqiq və dolğun məlumatların təqdim edilməsi üçün əlverişli şərait yaradar. Bu, dezinformasiyalar üçün zəruri olan zəminin ortadan qaldırılması deməkdir. Ortaq media platformasının yaradılması da ictimaiyyətə təqdim edilən xəbərlərin etibarlılığını, dürüstlüyünü və dəqiqliyini təmin etmək baxımından olduqca vacibdir. Xəlilov hesab edir ki, forum iştirakçıları Prezident İlham Əliyev tərəfindən irəli sürülən təkliflərin reallaşması istiqamətində lazımi addımlar atacaqlar. Bununla da onlar qlobal informasiya təhlükəsizliyinin təmin edilməsinə böyük töhfə vermiş olacaqlar.