"Digital Silk Way” layihəsi Azərbaycanın beynəlxalq rəqəmsal əlaqəliliyini gücləndirəcək - BERİ baş katibi

“AzerTelecom” tərəfindən həyata keçirilən “Digital Silk Way” layihəsi Azərbaycanın beynəlxalq rəqəmsal əlaqəliliyini xeyli artıracaq. Bu barədə Beynəlxalq Elektrik Rabitə İttifaqının (BERİ) baş katibi Dorin Boqdan-Martin Bakıda keçirilən Ümumdünya Telekommunikasiya İnkişafı Konfransında (“WTDC-25”) çıxış edərkən bildirib.

O qeyd edib ki, bu layihə ölkənin beynəlxalq əlaqə imkanlarını və rəqəmsal infrastrukturunun dayanıqlığını daha da yüksəldəcək. Dorin Boqdan-Martin izah edib ki, yeni optik-lifli magistral kanal sayəsində Azərbaycan Gürcüstanla, oradan da Avropa ilə birləşdirilir. “Digital Silk Way” layihəsi nəqliyyat marşrutu kimi böyük əhəmiyyətə malikdir.

BERİ baş katibi çıxışında həm də Azərbaycanın rəqəmsal inkişaf strategiyasına toxunub. O, vurğulayıb ki, “Rəqəmsal Azərbaycan 2030” strategiyası ölkədə rəqəmsal transformasiyanı aktivləşdirir. Bu proses, bulud xidmətlərinə, ağıllı infrastrukturun yaradılmasına və süni intellekti dəstəkləyən məlumat mərkəzlərinə yatırılan sərmayələr vasitəsilə həyata keçirilir.

Dorin Boqdan-Martin əlavə edib ki, bu cür təşəbbüslər qlobal əlaqəliliyin gücünü və əhəmiyyətini aydın şəkildə nümayiş etdirir. O xatırladıb ki, qlobal əlaqəlilik WTDC-25-in əsas mövzusudur. Nümayəndələr növbəti iki həftə ərzində qlobal rəqəmsal inkişaf gündəmini formalaşdırmaq üçün məhz bu mövzu ətrafında birləşəcəklər.