Direktorların işə qəbulunun başlanacağı tarix məlum olub

Direktor vəzifəsi vakant olan ümumi təhsil müəssisələrinə direktorların işə qəbulu prosesinin ən önəmli mərhələsi olan elektron sənəd qəbuluna oktyabrın 30-u saat 11:00-da start veriləcək. Namizədlər qeydiyyatdan keçmək üçün 11 noyabr 2025-ci il saat 17:00-dək vaxta malikdirlər.

Bu proses Məktəbəqədər və Ümumi Təhsil üzrə Dövlət Agentliyindən verilən məlumata əsasən, Elm və Təhsil Nazirliyi tərəfindən mərkəzləşdirilmiş qaydada proqram təminatı vasitəsilə müsabiqə yolu ilə həyata keçirilir. Bütün müsabiqə seçim və müsahibə olmaqla iki əsas mərhələdən ibarət olacaq. Namizədlər əvvəlcə elektron qeydiyyatdan keçməlidirlər.

Seçim mərhələsində namizədlərin təqdim etdiyi məlumatlar və sənədlərin düzgünlüyü yoxlanılır. Yalnız sənədləri təsdiqlənən şəxslər müsabiqənin müsahibə mərhələsinə buraxılacaqlar. Sistem üzərindən təqdim edilən vakant yerlər isə 15.10.2025-ci il tarixinə olan məlumatlara istinad edir. Namizədlərin müsahibə mərhələsinə dəvəti təhsil müəssisəsindəki şagirdlərin sayından (501-dən çox və ya 500-dək) və müəssisənin növündən (lisey, gimnaziya, internat tipli məktəb və s.) asılı olaraq ardıcıllıq əsasında aparılacaq.

Müsahibə mərhələsi Elm və Təhsil Nazirliyi tərəfindən yaradılmış müvafiq komissiyalar tərəfindən keçirilir. Namizədlər müsahibədə liderlik və strateji idarəetmə, pedaqoji və tədris bilikləri, idarəçilik və təşkilatçılıq qabiliyyətləri üzrə qiymətləndiriləcəklər. Bundan başqa, onların ünsiyyət, problemlərin həlli, qərarvermə, rəqəmsal, texnoloji, sosial və emosional bacarıqları da nəzərə alınacaq. Hər bir namizəd nəticələri özünün “Şəxsi səhifə”si vasitəsilə öyrənə biləcək. Müsabiqədən uğurla keçmiş namizədlərlə əmək münasibətləri qanunvericilikdə müəyyən olunmuş qaydada rəsmiləşdiriləcək.