Əfqanıstanda güclü zəlzələ zamanı azı dörd nəfər ölüb, onlarla insan xəsarət alıb

Əfqanıstanın şimal hissəsində güclü zəlzələ baş verib. Təbii fəlakət nəticəsində azı dörd nəfər ölüb, onlarla insan xəsarət alıb. Bu məlumatı yerli "Afghanistan International" portalı yayıb. Yeraltı təkanların episentri Balx vilayətində yerləşirdi. Vilayət qubernatorunun sözçüsü ölüm hallarının Şolqara rayonunda qeydə alındığını təsdiqləyib.

Nəşrlər ölənlərin sayının kəskin şəkildə arta biləcəyi ehtimalını yüksək qiymətləndirirlər. CNN telekanalı ekspert hesabatlarına istinad edərək, zəlzələdən sonra kütləvi insan tələfatı ehtimalının olduğunu bildirib. Sosial şəbəkələrdə yayılan görüntülərdə əhəmiyyətli dağıntılar və onlarla ölüm halı göstərilir. Bununla belə, bu məlumatlar hələ rəsmi təsdiqini tapmayıb.

Zəlzələ 6,3 maqnitudada qeydə alınıb. Yeraltı təkanlar Bakı vaxtı ilə saat 00:28-də, ölkənin şimalında, Balx əyalətinin Məzari-Şərif şəhərindən 45 km cənub-şərqdə baş verib. Əfqanıstan seysmik cəhətdən aktiv zonadır. Məsələn, 2025-ci ilin avqust ayında bu ölkədə 6 maqnitudada zəlzələ qeydə alınmışdı. O zaman baş vermiş fəlakət nəticəsində 2 200-dən çox insan həlak olmuşdu.