Əmək vergiləri hələ də çox yüksəkdir və azaldılmalıdır - İsveçin maliyyə naziri

İsveçin maliyyə naziri Elizabet Svantesson ölkədə əmək vergilərinin hələ də çox yüksək olduğunu bəyan edib və onların azaldılmasının zəruriliyini vurğulayıb. Nazir bu fikirləri Vesteros şəhərində keçirilən “Mötədillər” Partiyasının qurultayında səsləndirib. Hökumət gəlir vergisi sistemini sadələşdirməyi planlaşdırır. Məqsəd əmək, təhsil və sahibkarlıq fəaliyyətini əhali üçün daha cəlbedici etməkdir. Bu vergi siyasəti ilə ölkə iqtisadiyyatının fəallığını artırmaq hədəflənir.

Təqdim edilən yeni iqtisadi proqram əmək vergilərinin hesablanması üçün fərqli prinsiplərin tətbiqini ehtiva edir. O, mövcud vergi sistemini köklü şəkildə dəyişdirməyi və dövlət gəlir vergisi ödəyən vətəndaşların sayını azaltmağı nəzərdə tutur. Maliyyə bazarları naziri Niklas Vikman bu böyük təşəbbüsü yüksək qiymətləndirib. O, bunu 1990-cı illərdən bəri həyata keçirilən ən böyük vergi islahatı adlandırıb və sistemin daha sadə, eyni zamanda daha ədalətli olmasına xidmət edəcəyini bildirib.

Nazir E. Svantesson qeyd edib ki, hökumət artıq on milyardlarla kron həcmində vergi endirimi həyata keçirsə də, bu dəyişikliklər hələ yetərli deyil. O, mövcud vəziyyəti tənqid edərək deyib: “Yuxarı vergi dərəcələri hələ də 50 faizi keçir və bu, ədalətsizdir.” Nazir hesab edir ki, dövlət ehtiyacından artıq vergi toplamamalıdır. Eyni zamanda, hökumət İsveç iqtisadiyyatının rəqabət qabiliyyətini artırmaq məqsədilə korporativ vergilərin də əlavə endirilməsi üzərində işləyir. Bu addımlar İsveçin ümumi iqtisadi mühitini gücləndirməyə yönəlib.