"Erisioni" gürcü ansamblı gələn il Bakıda konsert proqramı ilə çıxış edəcək

Gürcüstan Dövlət Akademik Xalq Mahnı və Rəqs Ansamblı "Erisioni" Bakı tamaşaçıları qarşısında böyük konsert proqramı ilə çıxış edəcək. Bu tədbirin gələn ilin yanvar ayının 16-da keçirilməsi planlaşdırılır. Ansamblın bədii rəhbəri Şermandi Çukuaseli verdiyi məlumata görə, konsert Heydər Əliyev Sarayında olacaq. Bədii rəhbər qeyd edib ki, bu konsert həm Gürcüstan, həm də Azərbaycan mədəniyyətləri arasında əməkdaşlığın gücləndirilməsi baxımından xüsusi əhəmiyyət daşıyır. Onun sözlərinə görə, tədbir eyni zamanda xalqlar arasında dostluq əlaqələrini möhkəmləndirməyə kömək edəcək.

Rəqs Ansamblının direktoru İvane Çxaidze hazırda həmin konsert proqramı üçün xüsusi hazırlıq işlərinin getdiyini əlavə edib. O bildirib ki, kollektiv üç illik fasilədən sonra yenidən Bakıya gəlir. Direktor Azərbaycan tamaşaçılarının onları hər zaman böyük sevgi ilə qarşıladığını vurğulayıb. "Erisioni" heyəti yenidən Bakı tamaşaçıları ilə görüşməyi səbirsizliklə gözləyir.