ƏÜO-nun hərbi qulluqçularının iştirak etdiyi “Dağ komando kursu” başa çatıb

Azərbaycan ilə Türkiyə arasında imzalanmış “Hərbi təhsil sahəsində əməkdaşlıq haqqında” müqavilə çərçivəsində qardaş ölkənin İsparta şəhərində Əlahiddə Ümumqoşun Ordusunun (ƏÜO) hərbi qulluqçularının iştirak etdiyi “Dağ komando kursu” uğurla başa çatıb.

Müdafiə Nazirliyinin məlumatına görə, kursun başa çatması münasibətilə buraxılış mərasimi təşkil olunub. Mərasim zamanı iki ölkənin Dövlət himnləri səsləndirildi. Təlimlər müddətində dinləyicilərə sutkanın istənilən vaxtı və fərqli şəraitlərdə müasir döyüş aparma üsulları öyrədilib. Həmçinin, onlara yeni texnologiyaların imkanları da aşılanıb.

Çıxış edənlər hərbi qulluqçuları kursu müvəffəqiyyətlə bitirdiklərinə görə təbrik etdilər. Vurğulanıb ki, kursda qazanılan bilik və bacarıqlar onların döyüş vərdişlərini artırmaq üçün böyük əhəmiyyət daşıyır. Bu təlimlər həm də hərbi heyətin peşəkarlıq səviyyəsinin yüksəldilməsində faydalı olacaq. Tədbirin sonunda kursu bitirən məzunlara müvafiq sertifikatlar təqdim edildi.