FHN 8 Noyabr – Zəfər Gününə həsr olunmuş silsilə tədbirlər keçirib (FOTO)

Fövqəladə Hallar Nazirliyinin (FHN) qurumları və regional mərkəzləri 8 Noyabr - Zəfər Gününün beşinci ildönümü münasibətilə bir sıra tədbirlər təşkil edib. Bakıda baş tutan bu silsilə tədbirlər Azərbaycanın müstəqilliyi və ərazi bütövlüyü uğrunda canından keçən qəhrəman övladların xatirəsini yad etməklə başladı. Tədbirlərdən əvvəl FHN-in şəxsi heyəti Şəhidlər Xiyabanını ziyarət etdi. Onlar şəhidlərin məzarları üzərinə gül dəstələri düzdülər, unudulmaz xatirələrini böyük ehtiramla yad etdilər.

Şəxsi heyət, həmçinin, böyük Zəfərin tarixi ilə bağlı yaradılmış kompleks və muzeylərə də baş çəkdi. Onlar cəsur əsgər və zabitlərimizin şərəfli döyüş yolu ilə tanış oldular. Nazirliyin əməkdaşları Ümummilli Lider Heydər Əliyevin abidəsi önünə də gül dəstələri qoydular, Ulu Öndərin əziz xatirəsini dərin ehtiramla andılar. Dövlət Himninin səsləndirilməsi ilə başlayan toplantılarda şəhidlərimizin və Ulu Öndər Heydər Əliyevin xatirəsi bir dəqiqəlik sükutla yad edildi.

Tədbir iştirakçıları Prezident, Silahlı Qüvvələrin Müzəffər Ali Baş Komandanı cənab İlham Əliyevin 2020-ci il dekabrın 3-də imzaladığı “Azərbaycan Respublikasında Zəfər Gününün təsis edilməsi haqqında” Sərəncamın əhəmiyyətindən danışdılar. Bu sənəd Azərbaycanın möhtəşəm Zəfər səlnaməsini əks etdirən tarixi bir sənəddir. Artıq beş ildir ki, Azərbaycan xalqı mədəniyyət, milli irs və qürur mənbəyi olan Şuşanın işğaldan azad edildiyi gün - 8 Noyabrı Zəfər Günü kimi qeyd edir. Bu böyük Qələbə Müzəffər Ali Baş Komandan İlham Əliyevin qüdrətli sərkərdəlik məharəti və parlaq diplomatik bacarığının, eləcə də qəhrəman əsgər və zabitlərimizin misilsiz şücaəti sayəsində qazanıldı.

Toplantılarda müharibənin tarixi fonu xüsusi qeyd olundu. Ermənistan silahlı qüvvələrinin təxribatlarına cavab olaraq 2020-ci il sentyabrın 27-də başlayan İkinci Qarabağ müharibəsi işğalçı dövlətin kapitulyasiya aktına imza atması ilə nəticələndi. Cəmi 44 gün ərzində, təxminən 30 il işğal altında qalan torpaqlarımız azad edildi. Bu tarixi Zəfərlə ölkəmizin ərazi bütövlüyü təmin edildi. Daha sonra 2023-cü il sentyabrın 19-dan 20-nə keçən gecə Qarabağdakı separatçı və qeyri-qanuni hərbi birləşmələrə qarşı 23 saat davam edən lokal anti-terror tədbirləri həyata keçirildi. Nəticədə Azərbaycanın bütün ərazilərində dövlət suverenliyi tam bərpa olundu.

Tədbirlərdə qeyd edildi ki, Prezident, Müzəffər Ali Baş Komandan İlham Əliyevin müdrik rəhbərliyi altında rəşadətli Ordumuzun qazandığı tarixi Zəfər hər bir vətəndaş üçün böyük qürur mənbəyidir. Bu Qələbə dövlət başçısı tərəfindən daha qüdrətli və çiçəklənən yeni Azərbaycanın qurulması istiqamətində tarixi bir dövrün başladığını göstərir. Toplantıların sonunda Zəfər Günü ilə bağlı film nümayiş etdirildi.