Fidan: "F-35"lərlə bağlı məsələ yaxın zamanda həll oluna bilər

Türkiyənin xarici işlər naziri Hakan Fidan ABŞ ilə ölkəsi arasındakı əhəmiyyətli müdafiə məsələlərinin yaxın zamanda həll edilməsinin mümkün olduğunu açıqlayıb. Fidan, xüsusən CAATSA (ABŞ-nin Sanksiyalar Vasitəsilə Düşmənlərinə Qarşı Mübarizəsi Aktı) kimi sanksiyaların ləğvi ilə bağlı irəliləyiş gözlədiyini bildirib.

Nazir bu məlumatı "A Haber" telekanalına verdiyi müsahibəsində səsləndirib. O, 25 sentyabr tarixində ABŞ Prezidenti Donald Trampın türkiyəli həmkarı Rəcəb Tayyib Ərdoğanla görüşündə iki ölkə arasında CAATSA kimi sanksiyaların olmaması gərəkdiyini söylədiyini diqqətə çatdırıb. H. Fidan qeyd edib ki, D. Tramp sözügedən sanksiyaların ləğvi ilə əlaqədar öz komandasına müvafiq tapşırıqlar verib.

Türkiyə xarici siyasət idarəsinin rəhbərinin sözlərinə görə, F-35 qırıcı təyyarələri ilə bağlı məsələ də yaxın gələcəkdə həll edilə bilər. Fidan, bu layihə ətrafında yaranan gərginliyin aradan qalxacağına ümid etdiyini göstərib. Nazir ilkin razılıq mətninin artıq hazır olduğunu bildirsə də, bunun detallarını ictimaiyyətə açıqlamayıb. Bu açıqlama, Ankara və Vaşinqton arasındakı müdafiə əməkdaşlığında müsbət dönüş nöqtəsi yarada bilər.