Filippində baş verən "Kalmaegi" tayfunu nəticəsində ölənlərin sayı 224-ə çatıb

Filippində "Kalmaeqi" tayfununun yaratdığı fəlakət nəticəsində həlak olanların sayı kəskin şəkildə artıb. Əvvəl 188 nəfər olduğu bildirilən ölənlərin sayı 224-ə yüksəlib. Həmçinin 109 nəfər hələ də itkin düşmüş hesab olunur.

Bu məlumatı "GMA News" telekanalı ölkənin Mülki Müdafiə İdarəsinə istinadən yayıb. Təbii fəlakət ölkənin bir çox hissəsində böyük dağıntılara səbəb olub. Kalmaeqi tayfununun yaratdığı fəlakət yüz minlərlə insanın həyatına təsir edib və xilasetmə işləri davam edir.

Faciənin ən pis təsir etdiyi yerlərdən biri Sebu adasıdır. Şiddətli yağışlar şəhər küçələrini su basıb. Nəticədə təkcə bu adada 158 nəfərin həyatını itirdiyi təsdiqlənib. Tayfun səbəbindən ölkə ərazisində ümumilikdə 526 nəfər yaralanıb. Fəlakətin miqyası o qədər böyükdür ki, yüz minlərlə insan evlərini tərk etmək məcburiyyətində qalıb. Bu insanlar təhlükəsiz yerlərə sığınmağa çalışırlar.

Bölgələrdə baş verən genişmiqyaslı ziyan və yüksək tələfat səbəbindən yerli hakimiyyət orqanları cavab tədbirləri görüb. Zərərçəkən əhaliyə kömək göstərmək və xilasetmə işlərini daha səmərəli şəkildə həyata keçirmək üçün bir sıra ərazilərdə fövqəladə vəziyyət elan edilib. Hazırda tayfunun təsirinə məruz qalan 53 yaşayış məntəqəsində fövqəladə vəziyyət qüvvədədir. Filippin hazırda bu mövsümün ən dağıdıcı fırtınalarından birinin nəticələri ilə mübarizə aparır.