Fiziki şəxslərin xaricdən əldə etdikləri dividend gəlirləri üzrə vergi dərəcəsi 5%-ə endirilir

Azərbaycanda fiziki şəxslərin xaricdən əldə etdikləri dividend gəlirləri üzrə vergi dərəcəsinin kəskin şəkildə azaldılması təklif edilir. Hazırda Milli Məclisdə müzakirə olunan "Azərbaycan Respublikasının Vergi Məcəlləsində dəyişiklik edilməsi haqqında" Qanun layihəsi bu mühüm dəyişikliyi ehtiva edir. Dəyişikliklərin əsas məqsədi sahibkarlığın təşviqi, vergi yükünün uyğunlaşdırılması və "kölgə iqtisadiyyatı"na qarşı mübarizənin gücləndirilməsidir. İqtisadiyyat Nazirliyi yanında Dövlət Vergi Xidməti bu qanun layihəsinin niyə hazırlandığını ictimaiyyətə açıqlayır.

Vergi Məcəlləsinin indiki müddəalarına əsasən, Azərbaycan Respublikasının rezidenti olan fiziki şəxslər xaricdən gələn qeyri-sahibkarlıq gəlirlərini bəyan edərkən 14 faiz vergi dərəcəsi ilə ödəməlidir. Təklif olunur ki, növbəti ildən həmin vergi dərəcəsi 14 faizdən 5 faizə endirilsin. Bu dəyişiklik həm xaricdən əldə edilən gəlirlərin könüllü şəkildə bəyan olunmasını stimullaşdıracaq, həm də vergi bazasının əhatə dairəsini genişləndirməyə imkan yaradacaq.

Bu vergi güzəşti xaricdə yerləşən maliyyə vəsaitlərinin və investisiyaların ölkəyə axınını təşviq etmək üçün əlavə stimullar formalaşdırır. Daha aşağı vergi yükü kapitalın ölkəyə geri qaytarılmasını iqtisadi baxımdan daha səmərəli edəcək. Dövlət beləliklə vətəndaşların xarici dividend gəlirlərinin bəyan edilməsi prosesini asanlaşdıraraq, milli iqtisadiyyatın güclənməsinə nail olmağı planlaşdırır.