Florian Zenqstşmid: "Azərbaycanın Çinin xaricə səyahət bazarında payı artır"

Azərbaycan Turizm Bürosunun İdarə Heyətinin sədri Florian Zenqstşmid jurnalistlərə açıqlamasında bildirib ki, Azərbaycanın Çinin xaricə səyahət bazarında payı getdikcə yüksəlir. Çin bu gün dünyanın ən böyük xaricə səyahət bazarı hesab olunur. Zenqstşmid qeyd edib ki, Azərbaycanın bu bazardakı payı hər il daha da artır.

Onun sözlərinə görə, iki ölkə arasında tətbiq olunan vizasız rejim turizm axınının genişlənməsinə böyük təsir göstərib. Zenqstşmid vurğulayıb ki, vizasız gediş-gəliş rejimi turist axınının artmasına əhəmiyyətli töhfə verir. Məsələn, biz ötən ilin eyni dövrü ilə müqayisədə bu il artıq 50 faizlik artım müşahidə edirik.

F. Zenqstşmid həmçinin "China Visitors Summit" çərçivəsində həyata keçirilən səylərdən danışıb. Bu tədbir çərçivəsində Çinin 51 böyük tur operatoru Azərbaycana səfər edib. Operatorlar təkcə paytaxtı deyil, həm də ölkəmizin ümumi turizm potensialını yaxından görüb tanıyıblar. Onlar yerli turizm və qonaqpərvərlik şirkətləri ilə görüşlər keçirərək, gələcək əməkdaşlığı müzakirə ediblər. Bu kimi səfərlər turizm potensialının tanıdılması üçün vacib addımdır.