Fransada ilk dəfə olaraq iri korporasiya terrorun maliyyələşdirilməsi ilə bağlı mühakimə olunacaq

Fransada beynəlxalq transmilli korporasiya olan "Lafarge"a qarşı məhkəmə prosesi keçiriləcək. Şirkət İŞİD də daxil olmaqla, bir sıra silahlı qruplaşmaları maliyyələşdirməkdə şübhəli bilinir. Bu, ölkə tarixində belə bir ittihamla mühakimə edilən ilk böyük korporasiyadır.

"Lafarge" qrupu və onun səkkiz keçmiş rəhbəri bu işdə ittiham olunur. Onlar sement zavodunun fəaliyyətini qoruyub-saxlamaq məqsədilə 2014-cü ilə qədər Suriyada ekstrimist qruplaşmalara, o cümlədən İŞİD-ə ödənişlər etməkdə təqsirləndirilir. İddialara görə, bu maliyyə axını zavodun münaqişə zonasında işləməsinə imkan verib.

Qeyd edilən məlumatlara əsasən, əksər xarici şirkətlər 2012-ci ildə Suriyanı tərk etdi. Lakin Lafarge isə fərqli qərar verdi. Şirkət yalnız xarici əməkdaşlarını ölkədən çıxardı. Şirkət suriyalı işçiləri isə yerində saxlayaraq fəaliyyətini davam etdirdi. Bu, şirkətin Suriyadakı əməliyyatları 2014-cü ilin sentyabrına qədər davam etdirməsinə səbəb oldu. Məhkəmə prosesi bu uzunmüddətli fəaliyyətin qanuni nəticələrini müəyyən edəcək.