Gələn ilin I rübündə TİF investisiya fəaliyyətinə başlayacaq

Türk İnvestisiya Fondu (TİF) investisiya fəaliyyətinə başlamaq üçün konkret vaxt müəyyənləşdirib. Fond 2026-cı ilin birinci rübünün sonunadək fəaliyyətə start verəcək. Bu qərar Qırğızıstanın Bişkek şəhərində keçirilən TİF-in Rəhbərlər Şurasının ikinci iclasında qəbul edilib.

Tədbirdə iştirak edən iqtisadiyyat nazirinin birinci müavini Elnur Əliyev, Türk dünyasında iqtisadi inteqrasiyanın son illər gücləndiyini vurğulayıb. O qeyd edib ki, sənaye, enerji, nəqliyyat və rəqəmsallaşma kimi sahələrdə əməkdaşlıq möhkəmlənib. TİF-in işə başlaması regional inkişafı sürətləndirəcək və üzv ölkələr arasında investisiya tərəfdaşlığını genişləndirəcək. Azərbaycan tərəfi iclas iştirakçılarına ölkədə yaradılmış əlverişli biznes mühiti və mövcud investisiya imkanları barədə məlumat verdi.

Üzv ölkələrin nümayəndələri TİF-in Türk dünyasında iqtisadi əməkdaşlığın və regional tərəfdaşlığın genişləndirilməsi baxımından əhəmiyyətini qeyd etdilər. Fondun tezliklə fəaliyyətə başlaması regionun dayanıqlı inkişafı, rəqabət qabiliyyətinin artırılması və investisiya imkanlarının daha effektiv yönləndirilməsi üçün önəmlidir. İclasda Fondun fəaliyyətinə dair məsələlər müzakirə edilib, Rəhbərlər Şurasının prosedur qaydaları ilə bağlı sənədlər qəbul edilib. TİF-in funksional beynəlxalq maliyyə institutuna çevrilməsi istiqamətində mühüm addım atılıb: Fonda üstün kreditor statusunun verilməsi məqsədi ilə müvafiq tədbirlərin görülməsinə dair qərar qəbul olunub.