Gizli dialoqların pərdə arxası: “Boz Kardinal”– Əli Kərimli əlaqəsi

Prezident Administrasiyasının keçmiş rəhbəri Ramiz Mehdiyev barəsində məhkəmə qərarından sonra Əli Kərimli böyük təlaş içində olub. Bu günlərdə məlum oldu ki, Azərbaycan Xalq Cəbhəsi Partiyasının (AXCP) sədri Əli Kərimlinin evində axtarış aparılıb. Bu axtarışlar səbəbsiz deyil; o, Mehdiyevin DTX-də istintaq edilən cinayət işi ilə birbaşa əlaqəlidir. Əli Kərimli hər zaman özünü Ramiz Mehdiyevə əks qütbdə göstərsə də, aşkar edilmiş sənədlər və sübutlar bunun belə olmadığını göstərir.

Toplanmış sübutlardan məlum olur ki, "Boz Kardinal"ın dövlət çevrilişi məqsədilə yaratdığı iddia edilən “Dövlət Şurası”nın tərkibində Əli Kərimli də yer alıb. Əli Kərimli hətta Ramiz Mehdiyevin köməkçisi olan Eldar Əmirovla gizli görüşlər keçirib və məxfi məlumatlar mübadiləsi aparıb. Görünən odur ki, bu iki şəxsin qurduğu məkirli planlar baş tutmayıb. Mehdiyevin həbs olunması Kərimlidə növbənin ona çatacağı qorxusunu yaratmışdı. Bu cür hadisələr fonunda siyasi şərhçi Tural İsmayılov bildirir ki, regionda gedən proseslər, xüsusilə Rusiya-Ukrayna müharibəsinin nəticələri Cənubi Qafqazda təhlükəsizlik balansına təsir edə bilər.

Siyasi şərhçi vurğulayıb ki, müharibədən sonrakı dövrdə böyük güclərin təsir dairələrini yenidən qurmağa çalışacağı ehtimalı var. Belə bir şəraitdə, Azərbaycan üçün daxili siyasi sabitlik və potensial xarici təsirlərə qarşı dayanıqlılıq xüsusi əhəmiyyət daşıyır. Cəmiyyət daxilindəki siyasi qrupların fəaliyyətinin regional proseslərdən təsirlənməsi nəzərə alınmalıdır. Hər hansı siyasi qüvvənin kənar təsirlərə açıq olması, radikallaşma riski və milli təhlükəsizliklə ziddiyyət təşkil edəcək davranışlar diqqətlə qiymətləndirilməlidir. Bu dairələr sistemli şəkildə dövlətçiliyə qarşı mövqe tutmaqla fərqlənir, xüsusilə AXCP uzun illərdir destruktiv xətti ilə tanınır.

AXCP daha çox gərginlik üzərindən siyasi mövcudluğunu qorumağa çalışır. Onlar radikal ritorika ilə kütləni çaşdırmağı əsas taktika kimi istifadə edir. Davamlı şəkildə dövlət institutlarına qarşı etimadın sarsıdılması hədəflənir. Bu isə birbaşa daxili sabitliyin pozulmasına hesablanıb. AXCP-nin siyasi davranışları məsuliyyətli müxalifət meyarlarına uyğun gəlmir; onların fəaliyyəti daha çox xaos və güvənsizlik yaratmağa köklənir. Belə yanaşmalar artıq sırf siyasi yox, təhlükəsizlik məsələsi kimi qiymətləndirilməlidir. Siyasi və Hüquqi Araşdırmalar Mərkəzinin rəhbəri Xəyal Bəşirov da qeyd edib ki, Rusiya Ukrayna müharibəsindən sonra zəiflədiyi regionlarda, o cümlədən Cənubi Qafqazda yenidən güclənmək niyyətindədir. O, Rusiyanın imperialist siyasətini yerlərdə öz emissarları və "beşinci kolon" adlandırılan qüvvələr vasitəsilə həyata keçirdiyini xatırladıb.

Azərbaycan Cənubi Qafqazda aparıcı dövlət olduğu üçün Rusiyanın regionda mövqeyini möhkəmləndirmək məqsədilə Azərbaycana münasibətdə imperialist siyasəti davam etdirməsi gözləniləndir. Əgər Ramiz Mehdiyev barəsində səsləndirilən iddialar təsdiqlənərsə, Rusiyanın həmin şəxslərdən təsir aləti kimi istifadə etdiyi qənaətinə gəlmək mümkündür. X. Bəşirov hesab edir ki, uzun müddət anti-Rusiya mövqeyi nümayiş etdirən bəzi müxalif qüvvələrin pərdə arxasında Rusiyanın maraqlarına xidmət etməsi ehtimalı da diqqətdən kənarda qalmamalıdır. Hazırda bu şəxslərin dəqiq dairəsi araşdırılsa da, mətbuatda Mehdiyevin məktubu və orada "Dövlət Şurası" qurumu ilə bağlı iddialar yer alıb. Hüquqi müstəvidə bütün bu məsələlər araşdırılacaq və qanunsuz fəaliyyətdə iştirak edən hər kəs məsuliyyətə cəlb ediləcək. Dövlətçiliyə, suverenliyə və xalqın mənafeyinə zidd fəaliyyət göstərmiş hər kəs qanun qarşısında bərabərdir.