Goranboyda döşəməsi çökən bina söküləcək

Goranboy şəhərində döşəmənin çökməsi nəticəsində tamamilə yararsız hala düşən yaşayış binası söküləcək. Rayon Fövqəladə Hallar Komissiyasının sədri və Goranboy rayon İcra Hakimiyyəti başçısının birinci müavini Seymur Nəzərov bu barədə məlumat verib. O bildirib ki, qəzaya uğrayan binanın yerində yeni bir bina inşa ediləcək.

Hadisə noyabrın 23-də səhər saatlarında Goranboy şəhərinin Cəfər Cabbarlı küçəsi 4 ünvanında yerləşən, 60 mənzilli, beşmərtəbəli binanın 5-ci blokunun birinci mərtəbəsində baş verib. Bu qəza nəticəsində üç nəfər yüngül xəsarət alıb. Qəza baş verdikdən dərhal sonra Rayon İcra Hakimiyyətinin rəhbərliyi, FHN-in və digər qurumların əməkdaşları hadisə yerinə cəlb ediliblər. Müvafiq qurumlar gücləndirilmiş iş rejiminə keçərək sakinlərin təxliyə olunmasını həyata keçiriblər. Təhlükəsizlik qaydalarına riayət edilməklə əməliyyat işlərinə dərhal başlanıldı. Ərazi əlavə olaraq polis əməkdaşları tərəfindən mühafizə olunur, hadisə yerinin yaxınlığında postlar qurulub.

Fövqəladə Hallar Nazirliyi qurumlarının ilkin rəyi əsasında bina ilə bağlı yekun qərar qəbul edilib. Bu rəyə görə, binanın tamamilə sökülməsi və onun yerində yenisinin tikilməsi zəruridir. Bu söküntü qərarı 60 ailənin mənzil problemini həll etmək üçün atılan addımdır. Seymur Nəzərovun sözlərinə görə, bina sakinlərinin kirayəyə çıxarılması ilə bağlı işlər artıq yekunlaşıb. Qeyd edək ki, sakinlərin müvəqqəti yaşayış üçün tələb olunan kirayə xərcləri dövlət tərəfindən təmin olunacaq.