Gürcüstan Avronest sessiyalarında iştirakdan imtina edib

Gürcüstan ölkəyə olan ədalətsiz münasibətə görə “Avronest” Parlament Assambleyasının növbəti sessiyalarında iştirak etməyəcəyini açıqlayıb.

Bu mühüm qərarı Gürcüstan parlamentinin spikeri Şalva Papuaşvili özünün rəsmi “X” səhifəsində yazıb. Spiker bildirib ki, Gürcüstanın daimi nümayəndə heyəti “Avronest”in son plenar iclasında qəbul edilən bir sıra qətnamələrin hazırlanmasında iştirak etməyib. Tbilisi bu sənədlərə Avropa Parlamentinin bəzi üzvləri tərəfindən əlavə edilmiş müddəaları qətiyyən qəbul etmir.

Papuaşvilinin sözlərinə görə, həmin sənədlər əslində “Şərq tərəfdaşlığı” təşəbbüsünün gələcək inkişafına dair baxışı ehtiva etməli idi. Onlar həmçinin Aİ üzv dövlətləri arasında dialoqu və tərəfdaşlığı təşviq etməyə yönəlmişdi. Lakin sonradan qətnamə mətnlərinə edilən əlavələr Gürcüstan üçün tamamilə qəbuledilməz olub və rəsmi Tbilisidə böyük hiddətə səbəb olub.

Məhz qəbul edilən qətnamələrə əlavə edilən bu müddəalar və ölkəyə qarşı edilən ədalətsiz münasibət Gürcüstanı Parlament Assambleyasının işində iştirakdan imtinaya sövq edib. Gürcüstan bu səbəbdən Avronestin növbəti sessiyalarında yer almayacaq.