Gürcüstan XİN rəhbəri: Brüssel vizanı dayandırsa, məsuliyyət onların üzərində olacaq

Gürcüstan Xarici İşlər naziri Maka Boçorişvili Avropa İttifaqının (Aİ) viza liberallaşdırmasını dayandırması ehtimalı ilə bağlı gedən müzakirələrə sərt münasibət bildirib. Nazir bəyan edib ki, əgər Brüssel bu çətin qərarı qəbul etsə, bütün məsuliyyət tamamilə Aİ tərəfinin üzərində qalacaq. O, bu addımın birbaşa siyasi qərar olacağını vurğulayıb. Boçorişvili hesab edir ki, belə bir addım Gürcüstan xalqını demokratiyaya və etdiyi siyasi seçimə görə cəzalandırmaq məqsədi daşıyır.

Nazir “Imedi LIVE” proqramında çıxışı zamanı deyib: "Əgər Brüssel gürcü xalqını demokratiyaya görə cəzalandırmaq üçün bu çətin qərarı qəbul etsə, bu, tamamilə Brüsselin məsuliyyəti olacaq." O, bu cür yanaşmanın üstünlük təşkil etməməsinə ümid etdiyini bildirib. Maka Boçorişvili onu da qeyd edib ki, Avropa ilə inteqrasiya məsələsi illərdir ki, Gürcüstanın xarici münasibətlərində siyasi alətə çevrilib. Nazir oxşar proseslərin ölkəyə namizəd statusu verilməsi müzakirələrində də baş verdiyini xatırladıb.

M. Boçorişvili hazırda seçkilərin gözlənilmədiyini bildirərək, bu alətdən istifadə edilib, ictimai əhval-ruhiyyəni dəyişmək və ya "inqilab yaratmaq cəhdlərinin" mənasını soruşub. O, Gürcüstanın uzun müddət Assosiasiya Razılaşması çərçivəsində lider tərəfdaş sayıldığını, lakin sonradan ölkə haqqında mənfi kampaniyaların aparılmağa başlandığını söyləyib. Nazir həmçinin Ukrayna və Moldovanın Gürcüstanı Avropa inteqrasiyası baxımından geridə qoyduğu barədə səsləndirilən fikirləri qətiyyətlə rədd edib. O, bu iddiaların doğru olmadığını, əksinə, Gürcüstanın inkişaf göstəricilərinə görə hər iki ölkəni xeyli qabaqladığını deyib. Boçorişvili Gürcüstanın "geri qalmış ölkə" kimi təqdim olunmasını bəzi dairələr tərəfindən yaradılan süni obraz adlandırıb.