Hindistanda partlayiş olub, 22 avtomobil yanıb

Hindistan paytaxtı Yeni Dehlinin Köhnə Dehli ərazisində baş verən güclü partlayış hadisəsi ciddi fəsadlara səbəb olub. Hadisə nəticəsində ən azı 22 avtomobil və bir avtorikşa tamamilə yanıb. Partlayışın təsirindən yaxınlıqdakı nəqliyyat vasitələri ciddi zərər görüb. Yeni Dehli polisi hadisə ilə bağlı məlumat yayaraq, partlayış zamanı bir neçə nəfərin öldüyünü, digərlərinin isə yaralandığını təsdiqləyib.

Yeni Dehli polisi tərəfindən verilən məlumata görə, hadisə yerli vaxtla saat 18:52-də baş verib. Polis komissarı Satiş Qolça partlayışın necə baş verdiyini izah edib. O bildirib ki, yavaş hərəkət edən avtomobil qırmızı işıqda dayanıb və partlayış məhz həmin avtomobilin içərisində meydana gəlib. Bu partlayış nəticəsində ətrafda dayanan nəqliyyat vasitələrinə böyük ziyan dəyib. Polis komissarı ölən və yaralananların olduğunu qeyd edib.

Hadisə ilə əlaqədar Hindistanın bir sıra mühüm ərazilərində yüksək hazırlıq vəziyyəti elan edilib. Yeni Dehli, Uttar Pradeş ştatı və Mumbay şəhərlərində təhlükəsizlik tədbirləri sərtləşdirilib. Eyni zamanda, Hindistan hökuməti sərhəd ərazilərində də nəzarəti artırıb. Ölkənin Pakistan və Banqladeşlə sərhədləri boyunca patrul xidməti gücləndirilib.