Hindistanda pələng üç nəfəri parçalayıb

Hindistanın Karnataka ştatında meşə mühafizəçiləri iki həftə ərzində üç nəfəri öldürən təhlükəli pələngi ələ keçiriblər. Bu yırtıcı ştatın bir neçə kəndinə girərək sakinlərin həyatına son qoymuşdu. Hadisə ilə bağlı məlumatı "The Indian Express" nəşri yayıb.

Nəşrin bildirdiyinə görə, ələ keçirilən pələngin 13 yaşı var idi. Heyvanın artıq yaşlanması onun ov vərdişlərinə ciddi təsir göstərib. Pələng yaşının çox olması səbəbindən adi otyeyən heyvanları ovlaya bilmirdi. Dişləri sıradan çıxmış bu yırtıcı aclıqdan dolayı insanlara hücum etməyə başlayıb.

Təhlükəli heyvan kəndlərə daxil olaraq həm yerli sakinləri parçalamış, həm də onların mal-qarasına ziyan vurmuşdu. Pələngin son qurbanı Bandipur Vəhşi Təbiət Qoruğunun yaxınlığında yaşayan 35 yaşlı kənd sakini olub. Meşə mühafizəçilərinin müdaxiləsi sayəsində pələng tutulub və beləliklə, ətraf kəndlərdə əlavə faciələrin qarşısı alınıb.