İcmada İlham Əliyevin Qərbi Azərbaycan məsələsi ilə bağlı səsləndirdiyi fikirlər əsasında müzakirə keçirilib

Qərbi Azərbaycan İcması (QAİ) öz gələcək fəaliyyət istiqamətlərini müəyyənləşdirmək üçün mühüm müzakirə keçirdi. Bu tədbir Prezident İlham Əliyevin AMEA-nın 80 illik yubileyində Qərbi Azərbaycan məsələsi ilə bağlı səsləndirdiyi proqram xarakterli fikirlər əsasında təşkil olunub. Noyabrın 13-də keçirilən görüşdə QAİ-nin İdarə Heyətinin və müxtəlif şuralarının rəhbərləri, üzvləri, ziyalılar, ictimai xadimlər, eləcə də gənclər iştirak edirdilər.

Görüşün əsas məqsədi dövlət başçısının mesajlarının mahiyyətinə uyğun olaraq qurumun qarşıdakı fəaliyyətini təyin etmək, Prezident İlham Əliyevin çıxışındakı fikirləri tam təhlil etmək idi. QAİ-nin İdarə Heyətinin sədri, deputat Əziz Ələkbərov vurğuladı ki, Prezidentin çıxışlarında Qərbi Azərbaycan mövzusu xüsusi yer tutur. O bildirdi ki, dövlət başçısı hər dəfə bu məsələ ilə bağlı çıxışlarında tarixi ədalətin bərpası və azərbaycanlıların öz doğma yurdlarına dinc yolla qayıtmaq hüququnun təmin edilməsi baxımından siyasi mesajlar verir.

QAİ-nin Müşahidə Şurasının sədri Misir Mərdanov qeyd etdi ki, dövlət başçısının bu mövzuda ardıcıl və prinsipial mövqeyi Qərbi Azərbaycan məsələsinin artıq milli ideologiyanın tərkib hissəsinə çevrildiyini göstərir. O, həmçinin bu istiqamətdə elmi və maarifləndirici fəaliyyətləri gücləndirməyin vacibliyini vurğuladı. Ağsaqqallar Şurasının sədri Əhliman Əmiraslanov Prezidentin fikirlərinin Ermənistandan zorla çıxarılmış azərbaycanlılar üçün mənəvi dəstək və böyük motivasiya qaynağı olduğunu dedi. O əlavə etdi ki, məsələnin dövlət səviyyəsində gündəmə gəlməsi Qərbi Azərbaycanlıların illərdir üzləşdiyi ədalətsizlikləri aradan qaldırmaq üçün yeni mərhələnin başlanğıcıdır.

Müzakirələrdə Qərbi Azərbaycan İcmasının müxtəlif şura sədrləri də çıxış etdilər. Qadınlar Şurasının sədri Məlahət İbrahimqızı qeyd etdi ki, icmanın qadın üzvləri həm gənc nəslin milli yaddaşla böyüməsinə, həm də beynəlxalq ictimaiyyətdə Qərbi Azərbaycan həqiqətlərinin tanıdılmasına xüsusi əhəmiyyət verir. Nəzarət-Təftiş Komissiyasının sədri Vahid Novruzov Prezidentin ifadə etdiyi konseptual baxışların dövlətin strateji istiqamətini müəyyən etdiyini bildirərək, İcmanın fəaliyyətinin daha sistemli qurulmasının zəruriliyini vurğuladı. Ağsaqqallar Şurasının sədr müavini Vaqif Şadlinski və Ziyalılar Şurasının sədr müavini Nizami Cəfərov məsələnin siyasi tərəfləri ilə yanaşı, mənəvi, mədəni və tarixi ölçülərindən bəhs etdilər. Gənclər Şurasının sədri Şahin İsmayılov isə Qərbi Azərbaycan məsələsinin artıq gənc nəslin milli kimliyinin ayrılmaz hissəsinə çevrildiyini, buna görə də beynəlxalq təbliğat işlərinin artırılacağını bildirdi.