“İlin bankı” ABB oldu!

Qlobal maliyyə dünyasının ən nüfuzlu nəşrlərindən sayılan “The Banker” jurnalı 2025-ci ilin nəticələrinə görə "İlin bankı” mükafatının qaliblərini elan edib. Azərbaycan üzrə bu mötəbər mükafatı ABB qazanıb. Mükafat Londonda keçirilən təntənəli mərasimdə banka təqdim olunub. Bu qələbə ABB üçün xüsusi əhəmiyyət daşıyır, çünki jurnal 2021-ci ildən bəri ardıcıl olaraq beş ildir ki, Azərbaycan üzrə məhz ABB-ni “İlin bankı” seçir.

Bank bu mükafatı ümumi fəaliyyət göstəricilərinə və əməliyyatlarının effektivliyinə görə alıb. Qərar verilməsində aktivlərinin keyfiyyəti, dayanıqlı maliyyə mövqeyi və risk menecmenti standartları da nəzərə alınıb. ABB likvidliyə və rəqəmsal bankçılıqdan yüksək istifadə səviyyəsinə görə də digər banklardan fərqlənib. 2025-ci il üzrə “İlin bankı” mükafatına layiq görülmüş banklar sırasında Commerzbank, OTP Bank, UniCredit Bank, HSBC və VakıfBank kimi digər nüfuzlu qlobal maliyyə institutları da yer alıb.

“The Financial Times” qəzetinə aid olan “The Banker” jurnalı 1926-cı ildən nəşr edilir və uzun bir tarixə malikdir. Jurnalın 2000-ci ildən təqdim etməyə başladığı “İlin bankı” mükafatı bankçılıqda mükəmməllik standartına çevrilib. Beynəlxalq nüfuzuna görə bu mükafatı "Bankçılıq sektorunun Oskarı” kimi də qəbul edirlər. Mükafat hər il dünyanın 120-dən çox ölkəsini əhatə edir. Seçim regional və sektor ekspertlərinin, eləcə də redaktorlar heyətinin birgə qərarı ilə həyata keçirilir.

“The Banker” jurnalının mükafatlandırma mərasimi qlobal səviyyədə maliyyə sektorunun ən böyük toplantılarındandır. Hər il dünyanın müxtəlif ölkələrindən çoxsaylı bankların rəhbər şəxsləri tədbirdə iştirak edir. Bu, ABB-nin beynəlxalq maliyyə sahəsindəki gücünü və ardıcıl nailiyyətlərini təsdiqləyən mühüm bir hadisədir.