İlk dəfə Kəlbəcər Şəhəri Günü keçirilib, atəşfəşanlıq olacaq - FOTO - YENİLƏNİB

Bu gün Kəlbəcərdə, torpaqların işğaldan azad edilməsindən sonra ilk dəfə olaraq, Kəlbəcər Şəhəri Günü qeyd edilib. Tədbir Azərbaycan Respublikası Prezidentinin Xüsusi nümayəndəliyinin, Kəlbəcər rayonunda Bərpa, Tikinti və İdarəetmə Xidmətinin təşkilatçılığı və Mədəniyyət Nazirliyinin dəstəyi ilə baş tutdu. Bu günün qeyd edilməsi Kəlbəcərin zəngin mədəniyyətini təqdim etmək baxımından böyük önəm daşıyır. Eyni zamanda, bu hadisə illərlə yurduna həsrət qalan, indi doğma torpaqlarına geri qayıtmış sakinlər üçün həm rəmzi, həm də dərin mənəvi məna kəsb edir.

Tədbirə başlamazdan əvvəl, torpaqlarımızın azadlığı uğrunda canından keçmiş şəhidlərimizin əziz xatirəsi bir dəqiqəlik sükutla yad edildi və Azərbaycan Respublikasının Dövlət Himni səsləndirildi. Şəhər günü çərçivəsində müxtəlif mədəni proqramlar təşkil edilmişdi. Uşaqlar üçün Gəncə Dövlət Teatrının təqdim etdiyi “Tıq-tıq xanım” tamaşası böyük marağa səbəb oldu. Şəhər ərazisində qurulan sərgi zonası da ziyarətçilərə açıq idi. Burada “Kəlbəcər – obyektivdən tarixə” fotosərgisi və “Kəlbəcərin palitrası” adlı rəsm sərgisi nümayiş olundu. Fotolarda əsasən işğal dövrü və işğaldan sonrakı inkişafı əks etdirən kadrlar yer almışdı. Ziyarətçilər rəssamların, eləcə də bölgənin qədim aşıq sənətini təmsil edən aşıqların iştirakı ilə keçirilən ustad dərslərini izləyə bildilər. Bütün bunlar Kəlbəcərin sənət irsini göstərirdi.

Şəhər Günündə ictimai-siyasi xadimlər, Kəlbəcər ziyalıları, hərbiçilər və mədəniyyət xadimləri iştirak etdilər. Onlar Kəlbəcərin yenidən qurulan ictimai-mədəni həyatına öz dəstəklərini nümayiş etdirdilər. Bayram çərçivəsində qonaqlar üçün xüsusi qida və istirahət guşəsi də fəaliyyət göstərirdi. Burada qonaqlara Kəlbəcərin milli təamları təqdim edildi. Həmçinin bölgənin dağ bitkilərindən dəmlənmiş çayları və keyfiyyəti ilə seçilən Kəlbəcər balı nümayiş olundu. Bu təqdimatlar bölgənin təbii zənginliyini tanıtmaq baxımından əhəmiyyətli idi.

Qeyd edək ki, Kəlbəcər Şəhəri Günü Azərbaycan Respublikası Prezidentinin 31 iyul 2023-cü il tarixli Sərəncamına əsasən, hər il 25 noyabr tarixində qeyd edilir. Tədbirlər planına uyğun olaraq, günün sonunda konsert proqramı, müasir lazer şousu və atəşfəşanlıq təşkil edilməsi nəzərdə tutulur. Bu cür böyük bir tədbirin ilk dəfə keçirilməsi Kəlbəcər şəhərinin bərpası prosesinin mühüm hissəsidir. Tədbirin gələcək illərdə də ənənəvi olaraq təşkil edilməsi planlaşdırılır.