İtaliyada qar uçqunu nəticəsində beş almaniyalı alpinist həlak olub

İtaliyanın şimal hissəsində baş verən faciəvi qar uçqunu nəticəsində beş almaniyalı alpinist həyatını itirib. Hadisə Cənubi Tirolda yerləşən Ortles dağ silsiləsində qeydə alınıb. Dağ xilasetmə xidmətlərinə istinadən yayılan məlumata görə, bu hadisə regionda son illərin ən böyük dağ fəlakətlərindən biridir.

Əvvəlcə üç nəfərin həlak olduğu və iki Almaniya vətəndaşının itkin düşdüyü bildirilirdi. Lakin xilasedicilər geniş axtarış işlərindən sonra onların meyitlərini noyabrın 2-də səhər saatlarında tapa bildilər. Bu tapıntı ilə həlak olanların sayı beşə çatdı.

Uçqun 3 345 metr hündürlükdə yerləşən Fertaynşpitse zirvəsinin yaxınlığında qeydə alınıb. İlkin məlumatlar göstərir ki, qar kütləsi iki ayrı alpinist qrupunu əhatə edib. Qruplardan biri üç, digəri isə dörd nəfərdən ibarət idi. Xilasedicilər qeyd ediblər ki, birinci qrupun üzvləri tamamilə uçqunun altında qalıb və hər üçü ölüb.

İkinci qrupdakı dörd alpinistdən ikisi sağ qalıb. Digər iki nəfərin taleyi barədə isə bir müddət məlumat olmamışdı, lakin onların da meyitləri sonradan aşkarlanıb. Cənubi Tirol regionu almaniyalı turistlər arasında çox məşhur alpinizm bölgəsidir. Bölgənin ən hündür nöqtəsi 3 905 metr hündürlükdə yerləşən Ortles dağıdır.