Kəlbəcər şəhərinin sakinləri sosial müdafiə tədbirləri və mina təhlükəsi ilə bağlı maarifləndirilib

Kəlbəcər şəhərinə köçürülən sakinlər sosial müdafiə tədbirləri və mina təhlükəsi barədə məlumatlandırılıblar. Dövlət Komitəsi məlumat verir ki, məcburi köçkünlərlə iş sahəsində dövlət siyasətinin əsas istiqamətlərindən biri onların sosial müdafiəsini səmərəli təşkil etməkdir. Prezident İlham Əliyevin tapşırığına əsasən, doğma yurdlarına geri dönən keçmiş məcburi köçkünlərin rahatlığını və təhlükəsizliyini təmin etmək dövlət üçün prioritet məsələdir. “Məcburi köçkünlərin və onlara bərabər tutulan şəxslərin sosial müdafiəsi haqqında” Qanunda keçmiş məcburi köçkünlər üçün fərqli sosial müdafiə tədbirləri nəzərdə tutulur.

Bu tədbirlərdən biri də sosial müdafiəyə ehtiyacı olan məcburi köçkünlərin yararlandığı, dövlət büdcəsi hesabına ödənilən vahid aylıq müavinətdir. Qaçqınların və Məcburi Köçkünlərin İşləri üzrə Dövlət Komitəsi doğma yurduna qayıtmağa hazırlaşan və işğaldan azad edilmiş ərazilərdə yeni məskunlaşan əhali arasında məlumatlandırma, təbliğat-izahat və maarifləndirmə işləri aparır. Bu işlər çərçivəsində onlara sosial müdafiə tədbirləri, o cümlədən vahid aylıq müavinətin qanunvericilikdə nəzərdə tutulan başaçatma müddətləri ətraflı izah edilir. Komitə həmçinin, daimi yaşayış yerinə geri qayıtmış şəxslərin vahid aylıq müavinətinin üç il müddəti başa çatdıqdan sonra dayandırılacağı barədə aydınlıq gətirir. Bu cür izahatlar müavinətin qanuniliyi və zəruriliyi məsələlərini tam başa düşməyə kömək edir.

Dövlət Komitəsi Böyük Qayıdışa dair I Dövlət Proqramına əsasən maarifləndirmə işlərində mina təhlükəsi məsələsinə xüsusi diqqət ayırır. Mina təhlükəsi ilə bağlı hazırlanmış videoçarx insanları ayıq-sayıq olmağa, xəbərdarlıq nişanlarının tələblərinə əməl etməyə çağırır. İşğaldan azad edilmiş ərazilərdə mina və partlayıcı hərbi sursatlarla bağlı təhlükəni aradan qaldırmaq üçün ərazilərdə müvafiq təmizləmə işləri həyata keçirilir. Bununla yanaşı, əhalinin maarifləndirilməsi işi də vacib sayılır. Bu məqsədlə növbəti tədbir Kəlbəcər şəhərinə köçürülən ailələr arasında keçirilib. Tədbirdə məcburi köçkünlərin sosial müdafiəsi və vahid aylıq müavinətin geri qayıtmış şəxslər üçün üç ildən sonra dayandırılması haqqında məlumatlar verilib, mina təhlükəsi videoçarxları nümayiş etdirilib.

Qeyd olunan video çarxlar mütəmadi olaraq mediada yayımlanır. Böyük Qayıdışa dair I Dövlət Proqramı çərçivəsində Dövlət Komitəsi aidiyyəti şöbələr, yerli nümayəndəliklər və Mənzil-Kommunal İstismar Sahələri vasitəsilə tədbirlər planına uyğun işləyir. Bu qurumlar tərəfindən məcburi köçkünlərlə mütəmadi olaraq qanunvericiliyin tələbləri barədə maarifləndirici görüşlər keçirilir. Həmçinin, sosial müdafiə tədbirlərinə dair məlumat kitabçaları və broşürlər hazırlanır, yeni videoçarxlar çəkilir və sakinlərə təqdim olunur. Bu addımlar keçmiş məcburi köçkünlərin yeni həyata adaptasiyasına kömək edir.