Keniya televiziyasında Azərbaycanın WUF13 ilə bağlı hazırlıqlarından bəhs edilib

Azərbaycanın Keniyadakı səfiri Sultan Hacıyev bu ölkənin ən geniş tamaşaçı auditoriyasına malik televiziya kanalı olan “Citizen TV”də yayımlanan “Diaspora Connect” adlı canlı verilişin qonağı olub.

Bu kanal sosial media hesablarında 10 milyondan çox izləyici toplayıb və qonşu ölkələrdə də göstərilir. Səfir proqramda ölkəmizin beynəlxalq müstəvidəki qlobal töhfələri və təşəbbüsləri haqqında məlumat verdi. Əsas mövzu 2026-cı ilin 17-22 may tarixlərində Bakının ev sahibliyi edəcəyi BMT-nin Ümumdünya Şəhərsalma Forumunun 13-cü sessiyasına (WUF13) Azərbaycan Hökumətinin hazırlıqları və planları idi. Səfir bu böyük hadisənin təşkili üçün görülən işləri xarici auditoriyaya çatdırdı. Azərbaycan WUF13-ə ev sahibliyi edərkən, bu platformadan regional və qlobal tərəfdaşlıqları möhkəmləndirmək üçün istifadə etməyi planlaşdırır.

Verilişdə Sultan Hacıyev Keniya ilə əməkdaşlığın vacibliyini xüsusi vurğuladı. O, iki ölkə arasında əlaqələrin dinamik inkişafından, eləcə də qarşılıqlı səfərlərin intensivləşməsindən danışdı. Səfir bildirdi ki, ölkə liderləri bu əməkdaşlığa böyük diqqət yetirirlər. Bu cür yüksək səviyyəli diqqət iki fərqli regionda yerləşən dövlətlər arasında möhkəm əlaqələrin qurulmasında mühüm rol oynayır. Hacıyev həmçinin Bakıda keçiriləcək Ümumdünya Şəhərsalma Forumu çərçivəsində Keniya ilə mümkün tərəfdaşlıq sahələrini də qeyd etdi.

Səfirin qonaq olduğu proqramda "Heydər Əliyev adına Beynəlxalq Təhsil Qrantı" proqramı çərçivəsində Azərbaycanda ali təhsil hüququ qazanan Keniyalı tələbələrlə canlı bağlantı da quruldu. Tələbələr Azərbaycandakı təhsil mühitindən, onlara göstərilən diqqətdən və yaradılan şəraitdən razılıqlarını ifadə etdilər. Onlar ölkəmiz haqqında müsbət təəssüratlarını Keniya ictimaiyyəti ilə bölüşdülər. Bu növ təhsil proqramları Azərbaycanın qlobal səviyyədəki humanitar töhfəsini göstərir, xalqlar arasında mədəni körpülərin yaradılmasına kömək edir.