KİV: Aİ Rusiya və Çindən gələn dezinformasiya təhdidləri ilə mübarizə aparmaq üçün mərkəz yaradacaq

Avropa İttifaqı (Aİ) Rusiya, Çin və digər ölkələrdən yayılan dezinformasiya təhlükələrinə qarşı mübarizə aparmaq üçün xüsusi bir qurum - Demokratik Davamlılıq Mərkəzi yaratmağa hazırlaşır. "The Guardian" qəzeti Aİ-yə aid layihə sənədinə istinad edərək bu barədə məlumat yayıb. Qəzetin yazdığına görə, bu təşəbbüsün müəllifi Avropa Komissiyasının (AK) rəhbəri Ursula fon der Lyayendir. Sənədin özünün isə noyabrın 12-də dərc olunması gözlənilir.

Nəşrin məlumatına görə, Avropa Komissiyası xarici informasiya müdaxilələrinə qarşı fəal mübarizə aparmağı planlaşdırır. Bu məqsədlə yeni mərkəzə Aİ-yə üzv dövlətlərdən və birliyə qoşulmağa çalışan ölkələrdən ekspertlər cəlb ediləcək. Aİ Avropada təsir qazanmaq uğrunda mübarizə aparan Rusiyanın hibrid hücumlarını ən böyük təhlükə hesab edir. Dezinformasiya təhdidinin digər əsas mənbəyi kimi isə Çin göstərilir.

Mərkəzin əsas rolu Aİ strukturları və üzv ölkələr arasında əlaqə mərkəzi kimi fəaliyyət göstərməkdir. O, birinci növbədə, məlumat mübadiləsi üçün şərait yaradacaq. Eyni zamanda, mərkəz digər dövlətlərin hökumətlərinin informasiyanı manipulyasiya etmək cəhdləri barədə operativ xəbərdarlıqlar etməyə imkan verəcək. Bu yeni mexanizm Avropa Birliyi ölkələrinin xarici informasiya təsirlərinə qarşı birlikdə müqavimət göstərməsində vacib rol oynayacaq.