KİV: Britaniya Qrenlandiyaya qoşun göndərə bilər

Böyük Britaniya hökuməti Qrenlandiyanın təhlükəsizliyini gücləndirmək məqsədilə digər Avropa ölkələri ilə birlikdə adaya qoşun göndərmək imkanlarını müzakirə edir. Bu addım ABŞ tərəfindən adanın potensial ilhaqının qarşısını almağa yönəlib. Hökumət mənbələrinə istinad edən "The Sunday Telegraph" qəzeti bildirir ki, Britaniya hərbi komandanlığı artıq Qrenlandiyada NATO missiyasının yaradılması planlarını hazırlayır.

Britaniya rəsmiləri son günlərdə Avropalı həmkarları, o cümlədən Fransa və Almaniya ilə hərbi kontingentlərin yerləşdirilməsi hazırlıqlarına başlamaq üçün bir neçə görüş keçiriblər. Nəşr bu planların hələ ilkin mərhələdə olduğunu qeyd edir. Londonun bu NATO missiyasına sadəcə personal deyil, həm də hərbi gəmilər və təyyarələr təqdim edə biləcəyi güman edilir. Avropa ölkələri ümid edirlər ki, Qrenlandiyada NATO-nun artan hərbi iştirakı ABŞ Prezidenti Donald Trampı adanı ilhaq etmək barədəki planlarından çəkinməyə inandıracaq. NATO missiyasının yaradılması Amerika liderinə bir növ qələbə iddiası verməyə imkan yaradar. Çünki Avropa ölkələri Atlantik okeanının bu hissəsində təhlükəsizliyin təmin edilməsi xərclərini öz üzərlərinə götürəcəklər.

Böyük Britaniya hökumətindəki bir mənbə qəzetə deyib ki, NATO daxilində regionda təhlükəsizliyin gücləndirilməsi üçün danışıqlar davam edir. Mənbə bildirib: "Biz heç vaxt tələsmirik, lakin Böyük Britaniya Arktikada çəkindirmə və müdafiəni təmin etmək üçün NATO müttəfiqləri ilə səylər göstərir." Qoşun göndərmə variantı yanvarın 8-də Brüsseldə keçirilən NATO müttəfiqlərinin görüşündə müzakirə edilib. Bu görüşün yekunlarına əsasən, NATO-nun Avropa Birgə Qərargahına Arktikada təhlükəsizliyin gücləndirilməsinin mümkün yollarını müəyyən etmək tapşırığı verilib. Bu, Qrenlandiyaya tammiqyaslı qoşunların yerləşdirilməsini, adada qısamüddətli təlimlərin keçirilməsini, kəşfiyyat məlumatlarının mübadiləsini və ya müdafiə xərclərinin Arktika regionunun xeyrinə alyans daxilində yenidən bölüşdürülməsini əhatə edə bilər.