KİV: İngiltərə Almaniya ilə birlikdə nüvə silahından istifadənin tərəfdarıdır

Böyük Britaniya hərbi rəhbərliyi Almaniya ilə nüvə silahından birgə istifadənin tərəfdarı olduğunu bildirib. "The Daily Telegraph" qəzetinin yaydığı məlumata görə, yüksək rütbəli hərbi məmurlar bu addımı dəstəkləyir.

Həmin məmurlar arasında keçmiş müdafiə qərargah rəisi və NATO-nun baş katibi kimi şəxslər də var. Onlar Britaniyanı Berlinlə yeni müdafiə paktı ilə bağlı danışıqlara başlamağa çağırıblar. Bu cür təkliflər, ABŞ-nin İkinci Dünya müharibəsi bitəndən bəri Avropa təhlükəsizliyinin qarantı rolunu nə vaxtsa dayandıracağı ilə bağlı artan narahatlıqlar fonunda ortaya çıxıb.

"The Daily Telegraph" yazır ki, Böyük Britaniya və Almaniya arasında bu məsələ ilə bağlı rəsmi danışıqlar hələ başlamayıb. Hazırda Böyük Britaniyanın nüvə silahları Amerikanın Trident II (D5) ballistik raketlərini daşıyan dörd Vanguard sinifli sualtı qayıqda yerləşdirilib. London bu donanmaya əlavə olaraq, taktiki nüvə silahları ilə silahlanmış F35A qırıcıları əlavə etmək niyyətindədir.