KİV: Qəddafinin oğlu Seyf əl-İslam Liviyanın qərbində öldürülüb

Liviyanın keçmiş lideri Müəmmər Qəddafinin oğlu Seyf əl-İslamın qətlə yetirilməsi barədə məlumat yayılıb. O, ölkənin qərb hissəsində yerləşən Əz-Zintan şəhərində öldürülüb.

Bu xəbəri ilkin olaraq "Libya al-Ahrar" telekanalı yayıb. Əl-İslama yaxın mənbələr bildirir ki, hadisə naməlum yaraqlıların hücumu nəticəsində baş verib. Hadisənin əlavə təfərrüatları, o cümlədən hücumu törədənlərin kimliyi barədə hələlik ictimaiyyətə heç bir məlumat verilməyib.

Seyf əl-İslam son illərdə Liviya siyasətinə qayıtmaq planlarını açıqlamışdı. 2021-ci ildə o, keçirilməsi planlaşdırılan ümumi prezident seçkilərində namizədliyini irəli sürməyi planlaşdırdığını bəyan etmişdi. Həmin seçkilərin 2021-ci ilin sonlarında keçirilməsi gözlənilirdi, lakin onlar baş tutmayıb və indiyədək təxirə salınmış vəziyyətdə qalır.

Onun prezidentliyə namizəd olmaq ehtimalı 2023-cü ildə Birləşmiş Millətlər Təşkilatı tərəfindən də təsdiqini tapmışdı. BMT Baş katibinin Liviya üzrə xüsusi nümayəndəsi və BMT-nin ölkədəki dəstək missiyasının rəhbəri Əbdülay Batili bəyan etmişdi ki, Qəddafinin böyük oğlunun istəyi olarsa, prezidentliyə namizədliyini irəli sürməyə haqqı var. Seyf əl-İslamın ölümü Liviyada onsuz da gərgin olan siyasi mənzərəni daha da mürəkkəbləşdirir.