Kolumbiyada CELAC–Aİ sammiti işə başlayıb

Kolumbiyanın Santa Marta şəhərində Latın Amerikası və Karib Dövlətləri Birliyi (CELAC) ilə Avropa İttifaqının (Aİ) iki günlük sammiti öz işinə başlayıb. Bu görüşün əsas mövzuları ticarət əlaqələrinin gücləndirilməsi və mütəşəkkil cinayətkarlıqla mübarizədir. Qeyd etmək lazımdır ki, sammit ABŞ-nin Avropa müttəfiqləri və Latın Amerikası ölkələrinə artan təzyiqləri fonunda keçirilir.

Braziliyanın xarici işlər naziri Mauro Vieyra sammitdə müzakirə edilən siyasi məsələlər haqqında danışıb. Nazir bildirib ki, CELAC-ın 33 üzvü ABŞ-la münasibətlərdəki gərginliyə cavab olaraq, sammitin dördüncü iclasında Venesuelaya həmrəylik göstərə bilərlər. Onun sözlərinə görə, iştirakçılar Karakasa dəstək bəyannaməsi qəbul edə bilərlər.

Ancaq müşahidəçilər düşünürlər ki, belə bir sənədin Avropa İttifaqının dəstəyini qazanması çətin olacaq. Onlar sammitin mühüm qərarlar qəbul etməsi ehtimalının az olduğunu söyləyirlər. Avropa İttifaqını bu tədbirdə Avropa Şurasının Prezidenti Antonio Koşta və İttifaqın xarici işlər və təhlükəsizlik siyasəti üzrə ali nümayəndəsi Kaya Kallas təmsil edir.