"Liverpul" yarımmüdafiəçisi ilə müqavilənin müddətini uzatmağa hazırlaşır

İngiltərənin "Liverpul" klubu yarımmüdafiəçisi Dominik Soboslai ilə yeni uzunmüddətli müqavilə imzalamağa hazırlaşır. Mersisayd təmsilçisi 25 yaşlı futbolçunun klubda qalmasını istəyir, buna görə də danışıqlara başlanılıb.

Məşhur insayder Nikolo Skiranın verdiyi məlumata görə, klub sözləşməni 2030 və ya 2031-ci ilin yayınadək uzatmağı planlaşdırır. Danışıqlar hələ hazırlıq mərhələsində olsa da, ölkə çempionu Macarıstanlı oyunçuya təkmilləşdirilmiş əməkdaşlıq şərtləri təklif etməyə hazırdır. Soboslainin hazırkı müqaviləsi 2028-ci ilin yayınadək qüvvədədir.

Dominik Soboslai 2023-cü ildən "Liverpul"un formasını geyinir. O, cari mövsümdə komandanın çıxışlarına böyük töhfə verib. Yarımmüdafiəçi 14 oyuna çıxaraq 2 qol vurub və 4 məhsuldar ötürmə ilə yadda qalıb. Klub futbolçunun uzun müddət komandada qalmasına ümid edir.