Luvrdakı soyğunla bağlı iki əsas versiya açıqlanıb

Paris prokurorluğu Luvr muzeyində baş verən qarətlə bağlı iki əsas versiya üzərində işləyir. Fransa paytaxtının prokuroru Lor Bekko bu barədə məlumat verib. Prokuror qeyd edib ki, mütəşəkkil cinayətkarlıq bu hadisədə iki fərqli məqsəd güdə bilərdi. Cinayətkarlar ya konkret sifariş əsasında qarət törədiblər, ya da oğurlanan əşyaları sonradan pulların yuyulması üçün istifadə etməyi planlaşdırıblar.

Bekkonun sözlərinə görə, istintaq hazırda qarətdə mümkün xarici izin olması versiyasını "prioritet hesab etmir". Hadisə oktyabrın 19-da səhər saatlarında qeydə alınıb. Həmin vaxt maskalı qarətçilər Luvr muzeyinə hücum ediblər. Qısa müddət ərzində onlar Apollon Qalereyasına daxil olaraq doqquz zərgərlik əşyası oğurlayıblar.

Oğurlanan qiymətli əşyalar arasında III Napoleonun həyat yoldaşı imperatriçə Yevgeniyanın tacı da var idi. Maraqlıdır ki, tac sındırılmış vəziyyətdə küçədə tapılıb. Hüquq-mühafizə orqanları hazırda soyğunçuların axtarışını davam etdirir. İstintaqın gedişində cinayətin sifarişlə, yoxsa maliyyə əməliyyatları məqsədilə törədilməsi aydınlaşdırılacaq.