m10 ilə Binance əməliyyatları – manatla, təhlükəsiz, vasitəçisiz! (VİDEO)

Azərbaycanın aparıcı fintex platforması olan m10, dünyanın ən böyük kriptovalyuta birjası Binance ilə birlikdə ölkədə yeni bir xidmətə start verir. Bu əməkdaşlıq sayəsində ilk dəfə olaraq Azərbaycan manatı ilə vasitəçisiz kripto-fiat əməliyyatları mümkün olur. İstifadəçilər birbaşa m10 hesablarından Binance hesablarına manatla vəsait köçürə və ya çıxara bilərlər. Bütün bu əməliyyatlar tamamilə şəffaf, təhlükəsiz və hər hansı bir aralıq vasitəçi olmadan həyata keçirilir. Bu yeni xidmət istifadəçilərə rahatlıq və maliyyə şəffaflığı gətirərək, ölkədə kripto-ekosistemin inkişafı üçün mühüm bir addımdır.

Bu xidmət Azərbaycan Mərkəzi Bankının (AMB) xüsusi tənzimləmə rejimində (sandbox) sınaqdan keçirilən ilk fintex platforması kimi çıxış edir. m10, bu rəsmi statusu ilə yüksək təhlükəsizlik standartlarına malikdir. Bütün əməliyyatlar bank infrastrukturu üzərindən icra olunur, bu da prosesin qanunvericiliyə uyğunluğunu təmin edir. m10 və Binance inteqrasiyasının birinci mərhələsi AMB-nın sandbox rejimindən uğurla keçib və 6 aylıq sınaq müddətini başa vurub. Hazırda xidmət daha 6 ay müddətində davam edəcək ikinci mərhələdə sınaqlarını davam etdirir.

Əməliyyatlar yalnız Azərbaycan manatı (AZN) ilə aparılır və müəyyən edilmiş şərtlər mövcuddur. Vəsait əlavə edərkən 1%, vəsait çıxararkən isə 1.5% komissiya tətbiq olunur. Aylıq əməliyyat limiti 20,000 ABŞ dolları ekvivalentindədir. Bu limit birbaşa Azərbaycan Mərkəzi Bankının müvafiq qaydalarına əsaslanır. Xidmətdən yalnız Azərbaycan vətəndaşları faydalana bilər və KYC ("müştərini tanı") prosedurunun tamamlanması məcburi şərtdir. Əməliyyatlara başlamaq üçün istifadəçilər Binance tətbiqinə və ya rəsmi vebsayta daxil olaraq qeydiyyatdan keçməlidirlər. Daha sonra "Deposit" bölməsində AZN və m10 seçərək balanslarını artıra, yaxud "Withdraw" bölməsində m10 hesabını göstərərək vəsaitlərini geri ala bilərlər.

Qeyd edək ki, m10, Azərbaycanın aparıcı fintex şirkətlərindən biri olan PashaPay tərəfindən hazırlanmış rəqəmsal cüzdandır. 2022-ci ildən istifadəyə verilmiş m10, fərdlər və bizneslər üçün maliyyə əməliyyatlarını, vəsaitlərin idarə edilməsini və ödənişlərin həyata keçirilməsini təhlükəsiz və asan şəkildə təmin etməyi hədəfləyir.