Maduro Venesuelada kompleks milli müdafiə komandanlıqlarının yaradılmasına dair qanunu imzalayıb

Venesuela Prezidenti Nikolas Maduro parlament tərəfindən qəbul edilmiş “Kompleks milli müdafiə komandanlığı haqqında” qanunu imzalayıb. Bu sənəd ölkənin hərbi strukturunda mühüm dəyişikliklərə yol açır.

Dövlət başçısı bu addımı "Venezolana de Televisión" telekanalında çıxışı zamanı ictimaiyyətə açıqlayıb. Maduronun sözlərinə görə, qanun milli səviyyədə müdafiə idarəçiliyinin yenidən qurulmasını ehtiva edir.

Qanun ölkə konstitusiyasına əsaslanaraq, kompleks müdafiə komandanlıqlarının yaradılmasını nəzərdə tutur. Bu komandanlıqlar təkcə milli səviyyədə deyil, həm də hər bir ştatda və respublikanın mövcud olan 335 bələdiyyəsində fəaliyyət göstərəcəkdir. Yeni komandanlıqların əsas vəzifəsi isə Milli Bolivar Silahlı Qüvvələrinin hər cür şəraitdə fəaliyyətə tam hazır olmasını təmin etmək olacaq. Bu qərar Venesuelanın müdafiə mexanizmini gücləndirməyə yönəlmişdir.