Marneulidə baş verən atışma ilə bağlı iki nəfər saxlanılıb

Gürcüstanın Daxili İşlər Nazirliyi (DİN) Marneulidə bir neçə gün əvvəl baş vermiş atışma hadisəsi ilə əlaqədar iki nəfərin saxlanıldığını rəsmən açıqlayıb. Saxlanılan şəxslərdən birinə qarşı cinayət işi başlanılıb.

DİN-in Kvemo Kartli, Kaxeti və Mərkəzi Kriminal Polis Departamentlərinin əməkdaşları bu hadisə ilə bağlı əməliyyat-axtarış tədbirləri həyata keçirmişlər. Saxlanılan şəxslərə qarşı qrup halında hədə-qorxu ilə tələb etmə, külli miqdarda əmlak əldə etmək məqsədilə qanunsuz odlu silah əldə etmə, saxlama və gəzdirmə ittihamları irəli sürülüb. Bu hadisənin kökündə kriminal avtoritet Elmuraz Məmmədovun tələbi durur. Əvvəllər bir neçə cinayətə görə məhkum edilmiş və hazırda qırmızı axtarışda olan Məmmədov, istintaq məlumatına görə, 2025-ci ilin sentyabrında Marneulidə yaşayan 1980-ci il təvəllüdlü iş adamı N.A.-nı Türkiyəyə 50 min ABŞ dolları köçürməyə məcbur edib.

İş adamı N.A. pulu ödəməkdən imtina edəndən sonra Məmmədov başqa bir addım atıb. O, Gürcüstanda yaşayan D.M., E.O. və A.A.-ya 10 min ABŞ dolları qarşılığında N.A.-ya məxsus avtomobil ehtiyat hissələri mağazasına atəş açmaq tapşırığı verib. Onlar sifarişi yerinə yetirərək avtomat silahla mağazanın fasadını zədələyiblər. Eyni iş çərçivəsində noyabrın 7-də başqa bir şəxsə də ittiham irəli sürüləcək; o, sifarişli adam öldürməyə hazırlaşmaqda və qanunsuz silah saxlamaqda ittiham olunur və hazırda cəzaçəkmə müəssisəsindədir. Polis bildirir ki, saxlanılan şəxslər törətdikləri cinayəti etiraf ediblər və istintaqla əməkdaşlıq edirlər. Faktla bağlı araşdırma aparılır. Cinayətlərin sübuta yetirilməsi halında təqsirləndirilən şəxsləri yeddi ilə qədər azadlıqdan məhrumetmə cəzası gözləyir.