Mədəniyyət Nazirliyi bəzi media resurslarında yayılan saxta məlumatlara aydınlıq gətirib

Son günlər bəzi media resurslarında Mədəniyyət Nazirliyinin fəaliyyəti ilə bağlı həqiqəti əks etdirməyən, rəsmi mənbələrə əsaslanmayan saxta məlumatlar yayılıb. Bu yalan xəbərlərin yayılması ilə əlaqədar nazirlik ictimaiyyətə xüsusi açıqlama yayıb.

Nazirlik ictimaiyyətin dəqiq və etibarlı məlumatlandırılması üçün yalnız rəsmi açıqlamalara və təsdiqlənmiş məlumatlara istinad edilməsini zəruri hesab edir. Mətbuatla işləyən qurum rəsmi mənbələrdən kənar yayılan heç bir xəbərə etibar edilməməsini tələb edir.

Açıqlamada ciddi xəbərdarlıq da yer alır. Qeyd edilir ki, rəsmi təsdiqini tapmamış, qərəzli və dövlət qurumunun nüfuzunu ləkələməyə yönəlmiş məlumatların yayımlanması Azərbaycan Respublikasının qanunvericiliyinin tələblərini pozur. Belə fəaliyyət hüquqi məsuliyyət tədbirlərinin görülməsinə əsas yaradır. Nazirlik bu cür halların birbaşa dövlət qurumunun nüfuzuna zərər vurduğunu vurğulayıb.