Məhkəmə "Qurtuluş" Reabilitasiya Mərkəzinin rəhbəri barədə qərar qəbul edib

“Qurtuluş” Reabilitasiya Mərkəzinin rəhbəri Ceyhun Salmanov barəsində seçilmiş həbs qətimkan tədbirindən verilən apellyasiya şikayətinə Sumqayıt Apellyasiya Məhkəməsində baxılıb. Məhkəmə şikayəti təmin etməyib və beləliklə, Salmanovun həbsdə qalması barədə əvvəlki qərar qüvvədə qalıb. Sumqayıt şəhər Məhkəməsinin qərarı ilə Ceyhun Salmanov və mərkəzin iki əməkdaşı barəsində 2 ay 10 gün müddətə həbs qətimkan tədbiri seçilmişdi.

Bu həbslər "Qurtuluş" Reabilitasiya Mərkəzi MMC-nin Sumqayıt ərazisində yerləşən müəssisəsindəki qanunsuzluqlarla bağlı daxil olmuş vətəndaş müraciətləri əsasında aparılan araşdırmadan sonra baş verib. Sumqayıt şəhər Prokurorluğunun məlumatına görə, ilkin istintaq tədbirləri zamanı ciddi şübhələr aşkar edilib. Müəyyən edilib ki, direktor Ceyhun Salmanov, Elşad Məhərrəmov, Natiq Əliyev və digər şəxslər qabaqcadan əlbir olublar. Onlar ayrı-ayrı vaxtlarda 7-dən çox şəxsi zor tətbiq etməklə və ya aldatmaqla Mərkəzin Corat qəsəbəsində yerləşən müəssisəsinə gətiriblər. Həmin şəxslər orada iradələri ziddinə, qanunsuz olaraq azadlıqdan məhrum ediliblər. Saxlanılanlar yaxınları ilə əlaqə saxlamaq imkanından, o cümlədən mobil telefon və digər rabitə vasitələrindən məhrum ediliblər. Onlara müxtəlif formada fiziki və psixi əzab verilib, hətta bəzi şəxslərin sağlamlığına xəsarət yetirilib.

Toplanmış sübutlar əsasında üç nəfər - Ceyhun Salmanov, Elşad Məhərrəmov və Natiq Əliyev Azərbaycan Respublikası Cinayət Məcəlləsinin fərqli maddələri ilə ittiham olunurlar. Bu maddələr arasında qəsdən sağlamlığa az ağır zərər vurma (127.1), qabaqcadan əlbir olan bir qrup şəxs tərəfindən iki və daha çox şəxsə əzab vermə (133.2.1, 133.2.3), ağır nəticələrə səbəb olan adam oğurluğu (144.3), həmçinin qanunsuz azadlıqdan məhrum etmə (145.2.1 və 145.2.4) var. Sumqayıt şəhər Məhkəməsi istintaq orqanının vəsatəti əsasında onlar barəsində həbs qətimkan tədbiri seçib. Qeyd edilən qanunsuz əməllərin törədilməsində iştirak etmiş digər şəxslərin müəyyən edilməsi məqsədilə istintaq və əməliyyat-axtarış tədbirləri hazırda davam edir.