Mert Çelik: "Mən günahsızam, yenidən Azərbaycan millisinə dəvət almaq istəyirəm" - MÜSAHİBƏ

Azərbaycan millisinin sabiq futbolçusu Mert Çelik Türkiyə futbolunun gündəmini zəbt edən mərc oyunları qalmaqalında adının hallanmasına müsahibə verib. "Neftçi" və "Səbail"də oynamış müdafiəçi, hazırda "Sivasspor"un şərəfini qoruyur. O, mərc iddiaları səbəbindən 45 günlük futboldan kənarlaşdırılsa da, özünü tamamilə günahsız sayır.

O bildirib ki, ilk gündən bəri yaxın ətrafına heç bir mərc oyunu oynamadığını deyirdi. Nəhayət, həqiqət üzə çıxıb. Çelik məhz adının belə bir mənfi məsələdə yer almasının onu ən çox narahat edən məqam olduğunu söyləyib. O, baş verənlərə görə təəssüf hissi keçirdiyini və bu vəziyyətin ən yüngül cəza ilə bitməsinin ona müəyyən mənada təsəlli verdiyini qeyd edib.

Çelik aydınlıq gətirib ki, onun cəzalandırılmasının səbəbi uşaqlıq illərində açdığı, lakin varlığından xəbərsiz olduğu bir hesabı olması idi. Həmin hesabla heç bir mərc edilməsə belə, Türkiyə Futbol Federasiyasının (TFF) qaydalarına əsasən, hesabın mövcudluğu cəza tətbiq edilməsinə gətirib çıxarır. Futbolçu bu qanunu bilmədiyini etiraf edib. TFF ona mümkün olan ən aşağı həddə olan 45 günlük cəzanı tətbiq etdi. Mert Çelik bu hadisənin Azərbaycanda böyük rezonans yaratdığından xəbərdar idi, lakin "Sivasspor" rəhbərliyi ilk gündən onun sənədlərinin təmiz olduğunu bildiyi üçün ona güclü dəstək verib. Klub prezidenti və məşqçilər heyəti futbolçunun arxasında olduqlarını bildirərək onu motivasiya ediblər. O, "Sivasspor"un formasını geyinməyə davam edəcəyini vurğulayıb.

Müdafiəçi 45 günlük fasilə dövründə durmadan çalışacağını və daha güclü şəkildə geri dönməyi planlaşdırdığını söyləyib. O, həm "Sivasspor"un Superliqaya çıxması, həm də yenidən Azərbaycan yığmasına dəvət ala bilmək üçün əlindən gələni edəcək. Çelik milli komandaya çağırılmamasının bu məsələ ilə heç bir əlaqəsi olmadığını bildirir. O, əvvəllər Fernandu Santuş və Ayxan Abbasov tərəfindən heyətə salındığını, lakin rəsmi oyunlar üçün son anda kənarlaşdırıldığını qeyd edib. O, Azərbaycan tərəfindən heç kimin onunla əlaqə saxlamadığını da əlavə edib. Futbolçu günahsızlığına güvənərək, mərc oyunları ilə heç bir bağlılığı olmadığı üçün martda yenidən yığmaya çağırılacağına inanır və milliyə töhfə vermək arzusundadır.