Məşhur kolumbiyalı müğənni təyyarə qəzasında həlak olub

Kolumbiyanın Paypa şəhərində baş verən təyyarə qəzası altı nəfərin həyatına son qoydu. Həlak olanlar arasında ölkənin məşhur müğənnisi Yeison Ximenes də var. Kolumbiyanın Mülki Aviasiya İdarəsi bu barədə məlumatı rəsmi olaraq "X" sosial şəbəkəsində yayımlayıb. Hadisə 10 yanvar tarixində, yerli vaxtla təxminən saat 16:00-da baş verib.

Qurum Paypa şəhərindəki Xuan Xose Rondon aerodromunun yaxınlığında N325FA qeydiyyat nömrəli təyyarənin qəzaya uğradığını təsdiqlədi. Yerli "El Tiempo" qəzetinin verdiyi məlumata görə, qəza təyyarə Paypa hava limanından qalxandan qısa müddət sonra baş verib. Təyyarənin pilotu, kapitan Fernando Torres Rohas da faciə qurbanları arasındadır.

Şəhər meri German Rikardo Kamaço qəzetə bildirdi ki, hadisə yerində fövqəladə xidmətlər dərhal işə başlayıb. Yanğınsöndürənlər, xilasedicilər və tibb işçiləri qəza yerində çalışıblar. Həlak olan müğənni Ximenes 26 iyul 1991-ci ildə Kaldas departamentinin Mansanares şəhərində anadan olmuşdu. O, xüsusilə "Aventurero" və "Tenias Razon" kompozisiyaları ilə geniş şöhrət qazanmışdı.