Moldovada Yaşayan Azərbaycanlı Gənclərin II Forumu keçirilib (FOTO)

Azərbaycan Respublikasının Diasporla İş üzrə Dövlət Komitəsinin və ölkəmizin Moldovadakı səfirliyinin dəstəyi ilə Azərbaycanlı Gənclərin II Forumu keçirildi. Moldova Azərbaycanlıları Konqresinin təşəbbüsü ilə təşkil edilən bu tədbir Şanlı Zəfərimizin beş illiyinə həsr edilmişdi. Forum Azərbaycan və Moldovanın Dövlət himnləri səsləndirildikdən sonra işə başladı. Tədbirdə deputatlar, dövlət rəsmiləri, xarici ölkələrin səfirləri, universitet rəhbərləri və soydaşlarımız iştirak edirdilər.

Moldova Azərbaycanlıları Konqresinin sədri Elçin Bayramov çıxışında forumun Zəfərimizin 5 illiyi ilə əlaqədar olduğunu bildirdi. O, Moldovada yaşayan azərbaycanlı gənclərin ölkənin ictimai-siyasi həyatında, mədəniyyət və idman sahələrində aktiv fəaliyyət göstərdiyini vurğuladı. Azərbaycanın Moldovadakı səfiri Ülvi Baxşəliyev Azərbaycanın gənclər siyasətindən danışdı. O xatırlatdı ki, bu siyasətin əsasını Ulu Öndər Heydər Əliyev qoyub, Prezident İlham Əliyev isə bu kursu uğurla davam etdirir. Baxşəliyev deyir ki, gələcək nəsillərin vətənpərvər ruhlu və geniş dünyagörüşlü şəxsiyyətlər kimi yetişməsi dövlətin gənclər siyasətinin əsas hədəfidir.

Diasporla İş üzrə Dövlət Komitəsinin şöbə müdiri Ruslan Quliyev Forumun Qələbəmizin beşinci ildönümü ərəfəsində keçirilməsini müsbət qiymətləndirdi. O qeyd etdi ki, gənclərə diqqət və qayğı göstərmək Müzəffər Ali Baş Komandan İlham Əliyev siyasətinin prioritet istiqamətidir. Komitə dünyanın müxtəlif yerlərində yaşayan gənclərimizin səmərəli işləməsi üçün onlara dəstək verməyə davam edir. Tədbirdə iştirak edən Türkiyənin Moldovadakı səfiri Uyqar Mustafa Sertel və Moldova parlamentinin deputatları da çıxış etdilər. Deputatlar Natalya Davidoviç və Yevgeni Sinkeviç, habelə Təhsil Nazirliyindən Sergey Qurin azərbaycanlı gənclərin Moldova cəmiyyətinə uğurlu inteqrasiyası haqqında danışdılar. Forum çərçivəsində gənclərin ötən beş ilə dair hesabatı dinlənildi, idman və səhiyyə sahələrində hazırlanmış təqdimatlar göstərildi.

Tədbir sonunda forum iştirakçıları adından Azərbaycan Respublikasının Prezidenti İlham Əliyevə müraciət qəbul edildi. Müraciətdə qeyd edilir ki, Vətən müharibəsində qazanılan möhtəşəm Qələbə Ali Baş Komandanın rəhbərliyi ilə dövlətçiliyimizin müasir tarixinə şərəfli səhifə yazdı. Bildirilir ki, Azərbaycan gənci qəlbindəki Vətən sevgisi sayəsində döyüşlərin əsas ağırlığını öz üzərinə götürdü və 44 günlük müharibədə Zəfər salnaməsini yaratdı. Moldovada yaşayan azərbaycanlı gənclər Prezidenti əmin edirlər ki, onun apardığı uzaqgörən siyasət ətrafında sıx birləşəcək, Azərbaycanın inkişafı yolunda öz bilik və bacarıqlarını əsirgəməyəcəklər. Onlar bu şərəfi yaşadan müzəffər sərkərdəyə minnətdarlıqlarını ifadə etdilər.