Ombudsmanın Zəfər Gününün 5-ci ildönümü ilə əlaqədar Bəyanatı

Azərbaycan Respublikasının İnsan Hüquqları üzrə Müvəkkili (Ombudsman) Zəfər Gününün 5-ci ildönümü ilə əlaqədar bəyanat yayıb. Bəyanat 2020-ci il 27 sentyabr tarixində Ermənistanın törətdiyi müharibə cinayətlərinə həsr edilib. Həmin gün Ermənistan silahlı qüvvələri işğal siyasətini davam etdirmək üçün azərbaycanlı mülki əhalinin sıx yaşadığı yaşayış məntəqələrini ağır silahlardan istifadə edərək intensiv atəşə tutmuşdu. Nəticədə çoxlu dinc insan həlak oldu, yaralandı, mülki, inzibati və sosial obyektlər dağıdıldı.

Ombudsman bildirir ki, bu hərəkətlərlə Ermənistan beynəlxalq hüququ, dövlətlərin suverenliyi və ərazi bütövlüyünə hörmət kimi fundamental prinsipləri pozdu. Gücdən istifadə etməmək və mübahisələri sülh yolu ilə həll etmək prinsiplərinin pozulması Azərbaycanın suveren ərazisinə hərbi təcavüz demək idi. Bu təcavüz sülhə, təhlükəsizliyə, insanların həyat və sağlamlığına ciddi təhdidlər yaratdı. Azərbaycan BMT Nizamnaməsində təsbit edilmiş özünümüdafiə hüququndan istifadə etdi. Məqsəd vətəndaşların həyat və sağlamlığını müdafiə etmək, otuz ilə yaxın müddətdə işğal altında qalmış torpaqları azad etmək idi. Müzəffər Ali Baş Komandan İlham Əliyevin rəhbərliyi altında rəşadətli ordumuz cəmi 44 gün ərzində əraziləri işğaldan azad etdi. Xalqımızın həmrəyliyi ilə əldə olunan bu tarixi uğur xalqa şanlı Zəfər sevincini yaşatdı.

Vətən müharibəsi zamanı və ondan sonra əldə olunmuş qələbə dövlətimizin suverenliyini və ərazi bütövlüyünü tam təmin etdi. Müharibədən sonrakı dövrdə sülhə təhlükə yaradan separatçı qüvvələrin təxribat əməllərinin qarşısını almaq, habelə insan hüquqlarını qorumaq məqsədilə 2023-cü ilin sentyabrında lokal antiterror əməliyyatları həyata keçirildi. Bu tədbirlər nəticəsində regionda insan hüquq və azadlıqlarının qorunması üzrə geniş imkanlar yarandı. Cari ilin avqust ayında ümumilikdə Cənubi Qafqazda dayanıqlı sülhün təmini üçün mühüm hadisə baş verdi. Amerika Birləşmiş Ştatlarının Prezidentinin iştirakı ilə Azərbaycan və Ermənistan liderləri Vaşinqton şəhərində görüşdü. Bu görüş zamanı “Azərbaycan Respublikası və Ermənistan Respublikası arasında sülhün və dövlətlərarası münasibətlərin təsis olunması haqqında Saziş”in paraflanması ilə əsaslı şəraitin təməli qoyuldu. Bu, regionda yaşayan xalqların bir-birlərinin daxili işlərinə qarışmadan, sülh şəraitində firavan yaşayış sürmələri üçün zəmin yaradır.

Bütün müsbət irəliləyişlərə baxmayaraq, hələ də həlli vacib olan problemlər qalır. Bunlara işğal və müharibə dövründə itkin düşmüş soydaşlarımızın taleyinin aydınlaşdırılması, keçmiş məcburi köçkünlərin azad edilmiş ərazilərə təhlükəsiz və ləyaqətli qayıdış hüququnun tam təmin edilməsi daxildir. Həmçinin, minatəmizləmə prosesinin sürətləndirilməsi məqsədilə ölkəmizə dəqiq mina xəritələrinin təqdim olunması zəruridir. Azərbaycanın İnsan Hüquqları üzrə Müvəkkili olaraq beynəlxalq təşkilatlara, dünya dövlətlərinə, xarici ölkələrin ombudsmanlarına müraciət edirik. Biz hesab edirik ki, beynəlxalq hüquq normalarının təmini, müharibə nəticəsində pozulmuş insan hüquq və azadlıqların bərpası, daimi sülhün bərqərar edilməsi üçün birgə təşəbbüslər əsirgənilməməlidir. Bəyanatın sonunda ölkəmizin ərazi bütövlüyünün və suverenliyinin tam təmin olunması uğrunda həyatlarını itirmiş şəhidlərin əziz xatirəsi dərin ehtiramla yad edilir. Qurum ölkəmizə, regiona və dünyaya davamlı sülh və əmin-amanlıq arzu edir.