Özbəkistanlı futbolçu "Yuventus"un hədəfindədir

İtaliya A Seriyasının nəhəng klubu "Yuventus" heyətini gücləndirmək üçün maraqlı bir addım atır. "Persepolis"in futbolçusu Oston Urunov karyerasını İtaliyada davam etdirməyə yaxındır. İtaliya mətbuatının məlumatına görə, "Ağ-qaralar" özbəkistanlı vingeri transfer etmək istəyir.

Bu transfer iddiası ilə bağlı ilkin addımlar artıq atılıb. "Yuventus"un idman direktoru Marko Ottolini Özbəkistan milli komandasının baş məşqçisi Fabio Kannavaro ilə əlaqə saxlayıb. Ottolini bu əlaqə vasitəsilə oyunçu haqqında ətraflı məlumat almaq istəyib. Klubun planlarına görə, qarşıdakı transfer pəncərəsi açılan kimi rəsmi sənədləşdirmə prosesinə başlanılacaq.

Hazırda İran təmsilçisi "Persepolis"in şərəfini qoruyan Oston Urunov 24 yaşındadır. Futbolçu 2024-cü ilin yayından bəri bu komandada oynayır. Özbəkistanlı vinger cari mövsüm ərzində İran klubunun heyətində cəmi 9 rəsmi matça çıxıb və bu görüşlərdə yalnız bir qol ötürməsi ilə yadda qalıb.