Pakistan Senatının sədri: Konstitusiya dövlət və xalq arasında körpü rolunu oynayır

Pakistan Senatının sədri Səid Yusif Rza Gilani Milli Məclisdə keçirilən beynəlxalq parlament konfransında çıxış edib. Bu tədbir "Konstitusiya müasir dünyada dövlətlərin müstəqilliyinin və suverenliyinin təməli kimi" mövzusuna həsr olunmuşdu. Gilani öz çıxışında Konstitusiyanın əhəmiyyətini vurğulayıb. O qeyd edib ki, Konstitusiya dövlət və xalq arasında körpü rolunu oynayır.

Pakistan senatının sədri Azərbaycanda konstitusion suverenliyin təmin olunmasına xüsusi diqqət yetirib. O, bu nailiyyətlərin Prezident İlham Əliyevin siyasi rəhbərliyi altında əldə edildiyini bildirib. Səid Yusif Rza Gilaniyə görə, Azərbaycan müasirliyi rəhbər tutaraq öz müstəqilliyini və suverenliyini qorumaqdadır. Bu ilin Azərbaycanda Konstitusiya və Suverenlik İli elan edilməsi də ölkənin bu dəyərlərə sadiqliyinin nümayişidir.

Gilani çıxışında dövlətlərin müstəqilliyinə yönələn qlobal təhdidlərdən də bəhs edib. O bildirib ki, dünyada dəyər zəncirinin pozulması, eləcə də kibertəhlükələr və dezinformasiya kampaniyaları dövlətlərin suverenliyi üçün fərqli təhlükələr yaradır. Bu mənada, bu risklərin öhdəsindən gəlmək üçün birgə məsuliyyət çərçivəsinə diqqət yetirilməlidir.